અમદાવાદ: શહેરના નવા વાડજ વિસ્તારમાં આવેલ લાયોનેસ કર્ણાવતી એમ.એચ. હિન્દી હાયર સેકન્ડરી સ્કૂલ અને ગણેશ કન્યા વિદ્યાલયના સંયુક્ત ઉપક્રમે શાળા પરિસરમાં 80મા સ્વાતંત્ર્ય દિવસની હર્ષોલ્લાસ અને અનોખા દેશભક્તિપૂર્ણ માહોલમાં શાનદાર ઉજવણી કરવામાં આવી હતી.
આ પાવન અવસરે યોજાયેલા ધ્વજવંદન સમારોહમાં શાળાના વિદ્યાર્થીઓના વાલી મહેન્દ્રરામ ખોડિયાર તથા શ્રી પ્રવીણભાઈ યાદવ વિશેષ અતિથિ તરીકે ઉપસ્થિત રહ્યા હતા અને તિરંગો લહેરાવી સલામી આપી હતી. ધ્વજવંદન બાદ ધોરણ KGથી ધોરણ 10 સુધીના વિદ્યાર્થીઓએ એકથી એક ચડિયાતા દેશભક્તિથી ઓતપ્રોત રંગારંગ સાંસ્કૃતિક કાર્યક્રમો, નૃત્યો અને દેશભક્તિ ગીતો રજૂ કરી સમગ્ર વાતાવરણને રાષ્ટ્રપ્રેમમય બનાવી દીધું હતું.
સમારોહ દરમિયાન શાળાના ટ્રસ્ટી અનિતાબેન પટેલ તથા આચાર્ય દીપકભાઈ પટેલે પોતાના જોશીલા અને પ્રેરણાદાયી વક્તવ્ય દ્વારા વિદ્યાર્થીઓને રાષ્ટ્રભાવના, દેશપ્રેમ અને ભવિષ્યના જવાબદાર નાગરિક બનવાની પ્રેરણા આપી હતી.
કાર્યક્રમના અંતિમ ચરણમાં વિવિધ સ્પર્ધાઓમાં ઉત્કૃષ્ટ પ્રદર્શન કરનાર તેજસ્વી વિદ્યાર્થીઓને ઇનામો આપી સન્માનિત કરવામાં આવ્યા હતા. ઉપસ્થિત તમામ મહાનુભાવો, શિક્ષકો અને વિદ્યાર્થીઓ માટે અલ્પાહારની પણ સુંદર વ્યવસ્થા કરવામાં આવી હતી. સમગ્ર આયોજન અત્યંત ઉત્સાહ, ઉમંગ અને દેશભક્તિના ભાવ સાથે સફળતાપૂર્વક સંપન્ન થયું હતું.