અંબાજી : અંબાજીમાં ભાદરવી પૂનમના મહામેળાનો આજે બીજો દિવસ છે. મહામેળાના બીજા દિવસે પણ અંબાજીમાં મોટી સંખ્યામાં માઈભક્તો ઉમટી રહ્યા છે. વહેલી સવારથી જ માતાજીના દર્શન માટે ભક્તોની લાંબી કતારો જોવા મળી રહી છે. અંબાજીના માર્ગો પર ચારેકોર ભક્તોનો અવિરત પ્રવાહ જોવા મળી રહ્યો છે. દૂર દૂરથી આવેલા ભક્તો મા અંબાના દર્શન કરવા માટે અંબાજી પહોંચી રહ્યા છે, જેના કારણે સમગ્ર અંબાજી ભક્તિમય માહોલમાં જોવા મળી રહ્યું છે.
રિપોર્ટ મુજબ, અંબાજીમાં ભાદરવી પૂનમ મેળાના પ્રથમ દિવસે 3.37 લાખ અને આજે બીજા દિવસે 4.25 લાખ મળીને કુલ 2 દિવસમાં લાખોની સંખ્યામાં યાત્રિકો અંબાજી પહોંચ્યા છે. માતાજીના જયકારથી આખું અંબાજી ધામ ગૂંજી ઉઠ્યું છે અને ભક્તો અખંડ આસ્થા સાથે દર્શનનો લાભ લઈ રહ્યા છે.ભાદરવી પૂનમ મેળા દરમિયાન મંદિર ટ્રસ્ટ દ્વારા પ્રસાદ વિતરણની ઉત્તમ વ્યવસ્થા કરવામાં આવી છે. બે દિવસની અંદર આશરે 8 લાખ ઉપરાંત મોહનથાળના પવિત્ર પ્રસાદના પેકેટનું સફળ વેચાણ થયું છે. આ ઉપરાંત, ટ્રસ્ટ દ્વારા ચલાવવામાં આવતા નિઃશુલ્ક ભોજન કેન્દ્રમાં 1 લાખથી વધુ માઈભક્તોએ મહાપ્રસાદનો લાભ લીધો છે અને મેડિકલ ટીમો દ્વારા દર્દીઓની સતત સારવાર કરવામાં આવી રહી છે.
ભાદરવી પૂનમ મેળાના બીજા દિવસે મંદિરની દાન ભેટની આવકમાં ઘટાડો નોંધાયો છે. પ્રથમ દિવસે 32.89 લાખ રૂપિયા જ્યારે આજે બીજા દિવસે 24.59 લાખ રૂપિયાની આવક થઈ હતી, જેથી 2 દિવસમાં કુલ 57.39 લાખ રૂપિયાનું દાન પ્રાપ્ત થયું છે. આ ઉપરાંત, પ્રથમ દિવસે મંદિરના શિખરે 403 ધજાઓ ચઢી હતી જ્યારે આજે બીજા દિવસે 337 ધજાઓ નોંધાઈ છે. મેળાનો બીજો દિવસ સતત ગરમી અને ઉકળાટથી તપ્યો હતો, જેના કારણે વરસાદની આશા ફગાવી દેવાઈ છે અને ગરમીના પ્રકોપના લીધે ભક્તોની સંખ્યામાં થોડો ઘટાડો થયો હોવાનું અનુમાન છે.
મંદિર પરિસરમાં ભક્તોની ભીડ વચ્ચે સતત ‘બોલ માડી અંબે, જય જય અંબે’ના નાદ સંભળાઈ રહ્યા છે. આ જયઘોષથી સમગ્ર મંદિર પરિસર ગુંજી ઊઠ્યું છે. ભક્તોના ચહેરા પર માતાજીના દર્શનની ખુશી જોવા મળી રહી છે. અંબાજીના રસ્તાઓ પર પણ ભક્તિનો માહોલ જોવા મળી રહ્યો છે અને જ્યાં જુઓ ત્યાં માઈભક્તો જ નજરે પડી રહ્યા છે.
આગામી તારીખ 22 અને 23 સપ્ટેમ્બરના રોજ રાત્રિના સમયે મંદિરના ચાચરચોક ખાતે ભવ્ય ડ્રોન શો યોજાશે, જેમાં સેંકડો ડ્રોન દ્વારા આકાશમાં માતાજીની વિવિધ પ્રતિકૃતિઓના આકર્ષક આકારો બનાવાશે.