અમદાવાદ : અમદાવાદ શહેરમાં વધતી ટ્રાફિકની સમસ્યા અને પાર્કિંગ વ્યવસ્થાને વધુ સુવ્યવસ્થિત બનાવવા માટે મ્યુનિસિપલ કોર્પોરેશન દ્વારા પે એન્ડ પાર્કિંગના દરમાં વધારો કરવાનો નિર્ણય લેવામાં આવ્યો છે. નવા નિયમ મુજબ રોડ પર, બ્રિજની નીચે, પ્લોટ અને મલ્ટીલેવલ પાર્કિંગમાં વાહન પાર્ક કરવા માટે અલગ-અલગ ચાર્જ ચૂકવવો પડશે. ખાસ કરીને વધુ ટ્રાફિક ધરાવતા વિસ્તારોમાં પાર્કિંગનો દર વધારે રાખવામાં આવ્યો છે. નવા દર આગામી ડિસેમ્બર મહિનાથી અમલી બનશે.
રિપોર્ટ મુજબ, અમદાવાદ મ્યુનિસિપલ કોર્પોરેશન દ્વારા શહેરના મ્યુનિસિપલ કોર્પોરેશન સંચાલિત પે એન્ડ પાર્કિંગના ચાર્જમાં વધારો કરવામાં આવ્યો છે. મલ્ટી લેવલ પાર્કિંગ અને પ્લોટના પે એન્ડ પાર્કિંગમાં ટુ વ્હીલરમાં ઓછામાં ઓછા 10 રૂપિયા ચૂકવવા પડશે.જોકે રોડ ઉપર અને બ્રિજની નીચેના પાર્કિંગમાં પ્રથમ કલાકના શહેરના પૂર્વ વિસ્તારમાં 10 અને પશ્ચિમ વિસ્તારમાં 15 રૂપિયા વાહનચાલકોએ ચૂકવવાનો રહેશે.
જે વિસ્તારમાં સૌથી વધારે ટ્રાફિક રહે છે ત્યાં પાર્કિંગનો ચાર્જ ઓછામાં ઓછો પ્રથમ કલાકનો 20 રૂપિયા ચૂકવવો પડશે. દરેકના અલગ અલગ ચાર્જ નક્કી કરવામાં આવ્યા છે જે પ્રમાણે વાહન ચાલકોએ હવે ચાર્જ ચૂકવવો પડશે. આગામી ડિસેમ્બર મહિનાથી પાર્કિંગમાં નવા દરો શહેરમાં લાગુ પડશે. જો કે, કમિશનરે સૂચવેલા અન્ય સમયગાળાના દરમાં ઘટાડો કરીને કમિટીએ મંજૂરી આપી છે.
સ્ટેન્ડિંગ કમિટીના કમલેશ પટેલે જણાવ્યું હતું કે શહેરમાં પાર્કિંગ વ્યવસ્થાને વધુ સુવ્યવસ્થિત બનાવવા અને પાર્કિંગના દરમાં એકસૂત્રતા જળવાઈ રહે તે હેતુથી પાર્કિંગની લાયસન્સ ફી તથા દરના પુનઃનિર્ધારણ અંગે બેઠકમાં ચર્ચા કરવામાં આવી હતી. જે અંતર્ગત ઓફસ્ટ્રીટ પાર્કિંગ, ઓનસ્ટ્રીટ પાર્કિંગ, અને વધુ ગીચતા ધરાવતા વિસ્તારોમાં પાર્કિંગના એક સમાન દર નક્કી કરવામાં આવેલા છે.
હાલમાં પાર્કિંગની નીતિ અંતર્ગત અલગ-અલગ દરની જોગવાઈ કરવામાં આવી અને પાર્કિંગના દરની ત્રણ વર્ષ બાદ પુનઃસમીક્ષા આવશે.
1થી 3 કલાક માટે 20ને બદલે 15 રૂપિયા
3થી 6 કલાક માટે 35ને બદલે 25 રૂપિયા
6થી 12 કલાક માટે 50ને બદલે 40 રૂપિયા
12થી 24 કલાક માટે 70ને બદલે 55 રૂપિયા
આવી જ રીતો ફોર વ્હીલર, મીડિયમ કોમર્શિયલ વ્હીલર અને હેવી કોમર્શિયલ વ્હીકલમાં ભાવ વધારો કરાયો છે. જ્યારે આ વખતે બે કેટેગરી વધારવામાં આવી છે. જેમાં 3 વ્હીલર અને લાઈટ કોમર્શિયલ વ્હીકલનો સમાવેશ પ્રથમ વખત કરાયો છે.