અમદાવાદ : અમદાવાદના વાડજ પોલીસ હદ વિસ્તારમાં ઉસ્માનપુરા નાબાર્ડ બેંક નજીક જાહેર રોડ પર થયેલી લૂંટનો ભેદ એલસીબી ઝોન-1 ટીમે ઉકેલી બે આરોપીઓની ધરપકડ કરી છે. એલસીબી ઝોન-1 ટીમે આ ગંભીર ગુનાનો ભેદ માત્ર ગણતરીના કલાકોમાં જ સફળતાપૂર્વક ઉકેલી નાખી એક લાખથી વધુનો મુદ્દામાલ સાથે બે આરોપીની ધરપકડ કરી છે.
રિપોર્ટ મુજબ, શહેરના વાડજ વિસ્તારમાં નાબાર્ડ બેંકની આસપાસ જાહેરમાં લૂંટની આ ઘટના બની હતી.ઘટનાની ગંભીરતાને જોતાં પોલીસ તંત્ર હરકતમાં આવ્યું હતું અને તાત્કાલિક તપાસના ચક્રો ગતિમાન કર્યા હતા.પોલીસ ટીમે ઘટનાસ્થળની મુલાકાત લીધી હતી અને આસપાસના વિસ્તારોમાં લાગેલા સીસીટીવી ફૂટેજની તપાસ હાથ ધરી હતી.ટેક્નિકલ એનાલિસિસ અને હ્યુમન ઇન્ટેલિજન્સની માહિતીના આધારે પોલીસે ટૂંક સમયમાં જ ગુનેગારોનું સગડ મેળવીને તેમને દબોચી લીધા હતા. પોલીસની પૂછપરછ અને તપાસમાં આ લૂંટને અંજામ આપનાર બે શખ્સોના નામ સામે આવ્યા છે.
ઝડપાયેલા આરોપીઓમાં મોહમદઅરમાન શેખ અને સોહીલખાન પઠાણનો સમાવેશ થાય છે.આ બંને આરોપીઓ અમદાવાદના જ દાણીલીમડા વિસ્તારમાં રહેતા હોવાનું પોલીસ તપાસમાં ખુલ્યું છે.એલસીબીની ટીમે ત્વરિત કાર્યવાહી કરીને આ બંને આરોપીઓની ધરપકડ કરી લીધી હતી અને તેમની પાસેથી લૂંટમાં ગયેલા મૂલ્યવાન મુદ્દામાલની પણ સઘન કબજા કાર્યવાહી હાથ ધરી હતી.
પોલીસે પકડાયેલા આરોપીઓ પાસેથી ગુનામાં લૂંટાયેલી વસ્તુઓ જેવી કે,76,200ની કિંમતની એક સોનાની વીંટી, રૂ.40,000ની કિંમતનું એપલ આઈપેડ તેમજ રૂ.10,000 રોકડા રકમ કબજે કરી છે. પોલીસે કુલ મળીને રૂ.1,26,200/-નો ચોરીનો મુદ્દામાલ સુરક્ષિત રીતે રિકવર કરી લીધો છે.
વાડજ પોલીસ સ્ટેશન હદ વિસ્તારમાં ઉસ્માનપુરા નાબાર્ડ બેંક નજીક જાહેરમાં બનેલી લૂંટની એક સનસનાટીભરી ઘટનાએ સમગ્ર વિસ્તારમાં ચકચાર મચાવી દીધી હતી.