અમદાવાદ : બાંધકામ સાઈટને લગતી કોઈ પણ માહિતી મેળવવી હોય તો બિલ્ડર, તેની ઓફિસ કે પછી રેરાની સાઈટ પર જઈને ખાંખાખોળા કરવા પડે છે. પરંતું આજે 1 ડિસેમ્બરથી નવો નિયમ લાગુ કરવામાં આવ્યો છે. બાંધકામ સાઈટને લગતી તમામ માહિતીનું બોર્ડ QR કોડ સ્કેન સાથે ફરજિયાતપણે સ્થળ પર લગાવવામાં આવશે. પ્રોજેક્ટના સ્થળે તમામ માહિતીના બોર્ડ, બેનર લગાવવા RERA એ હુકમ કર્યો છે. જો કોઈ બિલ્ડર કે ડેવલોપર આ નિયમનું પાલન નહીં કરે તો તેને દંડ કરવામાં આવશે.
પ્રાપ્ત રિપોર્ટ મુજબ, ગુજરાત રીયલ એસ્ટેટ રેગ્યુલેટરી ઓથોરિટી (RERA) ની વેબસાઈટ પરથી મકાન કે દુકાન સહિતની મિલકત ખરીદવા આવનાર નાગરિકોને પ્રોજેક્ટના બાંધકામની માહિતી મળી રહે તેના માટે હવે દરેક બાંધકામ સાઈટ પર ડેવલપર- બિલ્ડર દ્વારા પ્રોજેક્ટને લગતી તમામ માહિતીનું બેનર બોર્ડ QR કોડ સાથે લગાવવાનું રહેશે. બોર્ડ અથવા બેનરની લઘુત્તમ પહોળાઇ 1.20 મીટર તથા લઘુત્તમ ઉંચાઈ 2 મીટર રાખવાની રહેશે. પ્રોજેક્ટના મુખ્ય પ્રવેશ પાસે અથવા મુખ્ય રસ્તા ઉપરથી જોઇ શકાય તે રીતે, જમીનથી 1.50મીટર થી 2 મીટર ઊંચાઇએ મુકવાનું રહેશે.
વોટરપ્રૂફ મટીરીયલના રાખવાના રહેશે અને તેનું બેકગ્રાઉન્ડ સફેદ અથવા પીળા રંગનું રાખવાનું રહેશે.બેનરમાં દર્શાવેલી વિગતોના અક્ષરની લઘુત્તમ ઊંચાઈ 2.50 સે.મી. રાખવાની રહેશે અને અક્ષરના રંગ નમૂનામાં દર્શાવ્યા અનુસાર જ રાખવાના રહેશે. આ ઉપરાંત તમામ વિગતો મોબાઇલથી સ્કેન કરી શકાય તે માટે QR કોડ દર્શાવવો પડશે.
આ ઉપરાંત પ્રોજેક્ટના સ્થળે પ્રદર્શિત કરેલ બોર્ડ / બેનર/ હોર્ડીંગ / ડીજીટલ ડીસ્પ્લેનો ફોટોગ્રાફ, આ હુકમ પ્રસિદ્ધ થયા બાદ, ભરવાના થતાં તમામ ત્રિમાસિક પ્રગતિ અહેવાલમાં, અચૂક અપલોડ કરવાનો રહેશે. આ ફોટોગ્રાફ જિયો ટેગ વાળો ફોટો હોવો જરૂરી છે. આ હુકમનું પાલન કરવામાં નિષ્ફળ જનાર ડેવલપર કે બિલ્ડરને દંડ ફટકારવામાં આવશે.
અત્યાર સુધી એવું હતું કે, કોઈ પ્રોજેક્ટ, બાંધકામ સાઈટની માહિતી ગ્રાહકને જોઈતી હોય તો તેમને બિલ્ડરની ઓફિસનો સંપર્ક સાધવો પડતો હતો. અથવા તો પ્રોજેક્ટ સંબંધી માહિતી માટે RERAની વેબસાઈટ ફેંદવી પડી હતી. તેમ છતાં અનેક લોકોને પ્રોજેક્ટ અંગેની પૂરતી માહિતી મળી રહેતી નથી. આ કારણે નાગરિકો હેરાન થતા હોય છે. તેથી RERAએ નાગરિકાના હિતમાં નવો હુકમ બહાર પાડ્યો છે.