અમદાવાદ : શહેરના સરદારનગર વિસ્તારમાં એક હૃદયદ્રાવક અને ખળભળાટ મચાવનારી ઘટના સામે આવી છે. એક અજાણ્યા શખ્સે ઘરમાં ઘૂસીને માસૂમ યુવતી પર એસિડ એટેક કર્યો હોવાની વિગતો પ્રાપ્ત થઈ છે. આ હિંસક હુમલાને પગલે સમગ્ર પંથકમાં ભય અને રોષનો માહોલ જોવા મળી રહ્યો છે. સરદારનગર પોલીસે યુવતીના નિવેદન નોંધવા સહિતની તજવીજ હાથ ધરી છે.
પ્રાપ્ત રિપોર્ટ મુજબ, સરદારનગર પોલીસ સ્ટેશન વિસ્તારમાં આવેલ નરોડામાં પરણિત યુવતી પર એસિડ અટેકની ઘટના સામે આવી છે. નીલકમલ સોસાયટી પાસે 27 વર્ષીય યુવતી તેના પિયરમાં રહેવા આવી હતી, ત્યાયુવતી જ્યારે પોતાના ઘરે હતી ત્યારે અચાનક એક અજાણ્યો શખ્સ અંદર ધસી આવ્યો હતો. કંઈ પણ સમજાય તે પહેલાં આ શખ્સે યુવતી પર એસિડ ફેંકી તેને ગંભીર રીતે ઇજાગ્રસ્ત કરી દીધી હતી. હુમલો કર્યા બાદ આરોપી તરત જ નાસી છૂટવામાં સફળ રહ્યો હતો. યુવતીની ચીસાચીસ સાંભળી આસપાસના લોકો દોડી આવ્યા હતા અને તેને તાત્કાલિક સારવાર અર્થે નજીકની હોસ્પિટલમાં ખસેડવામાં આવી છે.
ઘટનાની જાણ થતા જ સરદારનગર પોલીસનો કાફલો ઘટનાસ્થળે પહોંચી ગયો હતો. એફએસએલ (FSL) અને ડોગ સ્ક્વોડની મદદથી પુરાવા એકત્રિત કરવાની કામગીરી શરૂ કરવામાં આવી છે. આ હુમલા પાછળ અંગત અદાવત છે કે એકતરફી પ્રેમ, તે દિશામાં પોલીસ તપાસ કરી રહી છે. આસપાસના સીસીટીવી ફૂટેજ પણ ચેક કરવામાં આવી રહ્યા છે જેથી આરોપીને વહેલી તકે દબોચી શકાય. ભીડભાડવાળા વિસ્તારમાં ઘરમાં ઘૂસીને થયેલા આ હુમલાએ મહિલાઓની સુરક્ષા પર ગંભીર સવાલો ઉભા કર્યા છે.