અમદાવાદ: શહેરમાં સિનિયર સિટીઝનોને નિશાન બનાવી ડરાવી-ધમકાવી પૈસા પડાવતી ટોળકીનો વાડજ પોલીસ સ્ટેશનની સર્વેલન્સ સ્કોડ ટીમે પર્દાફાશ કર્યો છે અને ત્રણ આરોપીઓને ઝડપી લીધા છે. પોલીસ કમિશનરના આદેશ અને ઉચ્ચ અધિકારીઓના માર્ગદર્શન હેઠળ પેટ્રોલીંગમાં રહેલી ટીમે બાતમીના આધારે આ સફળ કામગીરી કરી છે. સમગ્ર મામલે વાડજ પોલીસે કુલ ત્રણ આરોપીઓની ધરપકડ કરી છે.
ઘટનાની વિગતે જાણીએ તો, આ ટોળકીની મોડસ ઓપરેન્ડી અત્યંત ચોંકાવનારી હતી. તેઓ રસ્તામાં સિનિયર સિટીઝનની કાર ઉભી રખાવી, “તમારાથી અકસ્માત થયો છે” તેમ કહી ખોટું કાવતરું રચતા હતા. ભોગ બનનાર વૃદ્ધને પોલીસ કેસની ધમકી આપી ડરાવીને તેઓ તેમને બેંક સુધી લઈ જતા અને બળજબરીથી નાણાં કઢાવતા હતા. આ કેસમાં ફરિયાદી પાસેથી આરોપીઓએ રોકડા રૂ. 1,00,000/- અને રૂ. 70,000/- નો ચેક લખાવી લીધો હતો.
વાડજ પોલીસે બાતમીના આધારે મુખ્ય આરોપી એવા જય જસવંતભાઈ રાવળ (25 વર્ષ) (ગોમતીપુર), સહઆરોપી તરીકે મહેશ ઉર્ફે હનુમાન નાનજી ઠાકોર (સારંગપુર) અને આકાશ નાનજીભાઈ ઠાકોર (સારંગપુર) ધરપકડ કરી છે.પોલીસે આરોપીઓ પાસેથી લૂંટમાં મેળવેલ તમામ મુદ્દામાલ રિકવર કર્યો છે જેમાં રોકડા રૂ. 1,00,000/- રૂ. 70,000/- નો બેંક ઓફ ઇન્ડિયાનો ચેકનો સમાવેશ થાય છે.
વાડજ પોલીસ સ્ટેશનના પી.આઈ. વી.આર. ડાંગરની સૂચના મુજબ, પી.એસ.આઈ. ડી.જે. દેસાઈ અને તેમની ટીમ જેમાં વિપુલકુમાર બળદેવભાઈ, બળવંતભાઈ રમેશભાઈ અને કેતનભાઈ હરેશભાઈનો સમાવેશ થાય છે, તેઓએ આ ગુનો ડિટેક્ટ કરવામાં મહત્વની ભૂમિકા ભજવી છે. હાલ આ મામલે વાડજ પોલીસે ગુનો નોંધી આગળની કાર્યવાહી હાથ ધરવામાં આવી છે.