અમદાવાદ : અમદાવાદ મ્યુનિસિપલ કોર્પોરેશન દ્વારા ગત વર્ષની જેમ આ વર્ષે પણ ‘સ્વચ્છ નવરાત્રિ’ સ્પર્ધાનું આયોજન કરવામાં આવ્યું છે. આ સ્પર્ધા મુખ્યત્વે બે શ્રેણીમાં યોજાશે, જેમાં શ્રેણી-1માં સોસાયટી, ફ્લેટ, હાઈરાઇઝ ટાવર્સનો સમાવેશ થશે. શ્રેણી 2માં પાર્ટીપ્લોટ, કોમ્યુનિટી હોલ ભાગ લઈ શકશે.સામૂહિક ગરબા આયોજકો માટે શહેર કક્ષાનું પ્રથમ ઇનામ 1 લાખ રૂપિયા, જ્યારે સોસાયટી માટે પ્રથમ ઇનામ 51 હજાર રૂપિયા રાખવામાં આવ્યું છે.
રિપોર્ટ મુજબ, સ્પર્ધામાં ભાગ લેવા માટે આયોજકોએ સંબંધિત વોર્ડના પબ્લિક હેલ્થ સુપરવાઇઝર મારફતે ઓફલાઇન ફોર્મ ભરી નોંધણી કરાવવાની રહેશે. રહેણાક સોસાયટીઓ માટે ઝોન કક્ષાએ પ્રથમ ઇનામ રૂ. 31 હજાર, દ્વિતીય ઇનામ રૂ.21 હજાર અને તૃતીય ઇનામ રૂ.11 હજાર છે જ્યારે શહેર કક્ષાએ પ્રથમ ઇનામ 51 હજાર, દ્વિતીય ઇનામ 31 હજાર અને તૃતીય ઇનામ 21 હજાર છે.
જ્યારે સામૂહિક ગરબા આયોજકો માટે ઝોન કક્ષાએ પ્રથમ ઇનામ રૂ.51 હજાર, દ્વિતીય 31 હજાર, તૃતીય 21 હજાર અને શહેર કક્ષાએ પ્રથમ વિજેતાને રૂ.1 લાખ, દ્વિતીય71 હજાર અને તૃતીય ઇનામ 51 હજાર છે.
આ નિયમો-માપદંડો રાખનારને જીતવાની વધુ તક
4 ડસ્ટબિનની વ્યવસ્થા: ગરબા સ્થળે કચરાના વર્ગીકરણ માટે ભીનો, સૂકો, સેનેટરી વેસ્ટ અને વિશિષ્ટ કાળજીવાળો એમ 4 અલગ રંગના ડસ્ટબિન ફરજિયાત મૂકવાનાં રહેશે.
સિંગલ યુઝ પ્લાસ્ટિક પ્રતિબંધ: ગરબાનું આયોજન સંપૂર્ણપણે ‘સિંગલ યુઝ પ્લાસ્ટિક ફ્રી’ હોવું અનિવાર્ય છે.
કચરાનો યોગ્ય નિકાલ: એકત્ર થયેલો કચરો ડોર-ટુ-ડોર વાહનમાં જ નિર્ધારિત સમયે આપવાનો રહેશે.
ફૂડ વેસ્ટ મેનેજમેન્ટ: સામૂહિક ગરબા આયોજકોએ કિચન વેસ્ટના નિકાલ માટે માન્ય એજન્સી સાથે ફરજિયાત કોન્ટ્રાક્ટ કરવાનો રહેશે.
નિર્માલ્ય વ્યવસ્થા: પૂજા સામગ્રી અને નિર્માલ્યનો નિકાલ અલગથી ત્રિ-વર્ગીકરણ કરીને નિર્માલ્ય વાહનમાં જ કરવાનો રહેશે.
RRR થીમ: ઝીરો વેસ્ટ અને રિડ્યુસ, રિયુઝ અને રિસાઇકલ કોન્સેપ્ટને અપનાવનાર આયોજકોને મૂલ્યાંકનમાં વિશેષ અગ્રિમતા મળશે.