અમદાવાદ : અમદાવાદ મ્યુનિસિપલ કોર્પોરેશનની સાપ્તાહિક સ્ટેન્ડિંગ કમિટીની બેઠક સ્ટેન્ડિંગ કમિટીના ચેરમેન કમલેશભાઈ પટેલની અધ્યક્ષતામાં યોજાઈ હતી. આ બેઠકમાં શહેરના વિકાસ, નાગરિક સુવિધાઓ, જાહેર આરોગ્ય, ટ્રાફિક વ્યવસ્થાપન અને વહીવટી કામગીરીને લગતા વિવિધ મુદ્દાઓ પર ચર્ચા કરવામાં આવી હતી.
રિપોર્ટ મુજબ, આ પ્રસંગે સ્ટેન્ડિગ કમિટીના ચેરમેન કમલેશભાઇ પટેલે ગોતા વોર્ડમાં જનતાનગર ઓવરબ્રિજ અંગે વાત કરતા જણાવ્યું હતુ કે, સમગ્ર દેશમાં ફાટકમુક્ત અભિયાનના ભાગરૂપે અમદાવાદના ગોતા વોર્ડમાં જનતાનગર ખાતે ઓવરબ્રિજ બનાવવાની કામગીરીનો મુદ્દો સ્ટેન્ડિંગ કમિટીમાં રજૂ થયો હતો. આ અંગે વૈકલ્પિક ટ્રાફિક મેનેજમેન્ટના ઉપાયો અને જંક્શન ઈમ્પ્રુવમેન્ટ, વન-વે સિસ્ટમ, સિગ્નલ ઓપ્ટીમાઈજેશન જેવા વિવિધ વિકલ્પોનું મૂલ્યાંકન કરવાની અધિકારીઓને સૂચના આપવામાં આવી છે.
ટ્રાફિક વ્યવસ્થાપનના વૈકલ્પિક ઉપાયોની વ્યવહારુતા અને અસરકારકતાનું મૂલ્યાંકન કર્યા પછી જ ઓવરબ્રિજનું કામ આગળ વધારવા અંગેનો નિર્ણય લેવામાં આવશે. જરૂરી વિગતો એકત્રિત કરીને ફરીથી કમિટી સમક્ષ રજૂ કરવામાં આવે તે માટે હાલ આ દરખાસ્ત પરત કરવામાં આવી છે.