અમદાવાદ : શહેરના બહેરામપુરા વોર્ડમાં દાણીલીમડા-પીરાણા રોડ પર આવેલા એસ્ટેટની જગ્યામાં લાયસન્સ વિના અનહાઇજેનિક કન્ડિશનમાં અને યોગ્ય માત્રામાં પદાર્થોનો ઉપયોગ કર્યા વિના ખૂબ જ હલકી ગુણવત્તાનો ટોમેટો સોસનો જથ્થો મ્યુનિસિપલ કોર્પોરેશનના ફૂડ વિભાગ દ્વારા જપ્ત કરવામાં આવ્યો છે.કોર્પોરેશનના ફૂડ વિભાગ દ્વારા 2000 કિલો રો મટીરીયલ સહિતનો ટોમેટા સોસનો જથ્થો જપ્ત કરી ફેક્ટરી સીલ સીલ કરવામાં આવી છે.
રિપોર્ટ મુજબ, શહેરના બહેરામપુરા વિસ્તારમાં સેન્ડવીચ અને બર્ગરમાં વપરાતા ટોમેટો સોસના યુનિટ પર દરોડો પાડવામાં આવ્યા હતા. આ દરમિયાન સોસ બનાવવા માટે ટામેટાંના બદલે બટાકાનો પાવડર અને હાનિકારક એસિડિક કલર સહિતની કેમિકલયુક્ત ચીજવસ્તુઓનો બહોળા પ્રમાણમાં ઉપયોગ કરવામાં આવતો હતો.આ ઉપરાંત સોસ બનાવવાની જગ્યા ઉપર અત્યત ગંદકી અને અસ્વચ્છતા જોવા મળી હતી.
ફૂડ વિભાગની પૂછપરછમાં સામે આવ્યું હતું કે સંચાલકો પાસે આ જગ્યાનું કોઈ લાયસન્સ નહોતું. જે નામે લાયસન્સ દર્શાવવામાં આવતું હતું તે સરનામું પણ ખોટું નીકળ્યું હતું. આમ, કોઈપણ જાતના માન્ય લાયસન્સ વિના ગેરકાયદે રીતે અતિ હલકી ગુણવત્તાના ‘ટેસ્ટી સ્નેક્સ કેચઅપ’ નામે સોસનું ઉત્પાદન કરી અલગ-અલગ દુકાનો અને ખાણીપીણીની લારીઓ પર વેચાણ કરવામાં આવતું હતું. ફૂડ વિભાગે ખરીદ-વેચાણના બિલ માંગતા સંચાલકો કોઈ બિલ રજૂ કરી શક્યા નહોતા.
સ્થળ પરથી ફૂડ વિભાગની ટીમે 2000 કિલો જેટલો રો મટીરીયલ અને તૈયાર સોસનો જથ્થો કબ્જે કર્યો છે. ફૂડ વિભાગે તાત્કાલિક ધોરણે આ ગેરકાયદે યુનિટને સીલ કરી દીધુ છે અને જપ્ત કરાયેલા તમામ અખાદ્ય જથ્થાના સેમ્પલ લઈને તેને નાશ કરવાની કાયદેસરની પ્રક્રિયા હાથ ધરવામાં આવી છે.