અમદાવાદ : સ્માર્ટ સિટી અમદાવાદને વધુ સ્વચ્છ બનાવવા માટે મ્યુનિસિપલ કોર્પોરેશન હવે એક્શન મોડમાં આવ્યું છે. ખાસ કરીને શહેરના પોશ ગણાતા પશ્ચિમ અને દક્ષિણ-પશ્ચિમ ઝોનના રહીશો માટે AMC એ અલ્ટીમેટમ આપ્યું છે. હવેથી સૂકો અને ભીનો કચરો અલગ આપવો ફરજિયાત છે, જો 10 દિવસમાં આ નિયમનું પાલન નહીં થાય તો તમારા ઘરેથી કચરો ઉપાડવાનું બંધ કરી દેવામાં આવશે.
અમદાવાદના પશ્ચિમ વિસ્તારમાં આવેલ AMC ના દક્ષિણ-પશ્ચિમ ઝોનમાં આવતા સેટેલાઈટ, જોધપુર, શ્યામલ, વેજલપુર, સરખેજ, જુહાપુરા, બોપલ, એસજી હાઇવે, પ્રહલાદનગર, આનંદનગર વિસ્તારોમાં રહેતા નાગરિકોએ સુકો અને ભીનો કચરો અલગ રાખવાનો રહેશે. ડોર ટુ ડોરની ગાડી કચરો લેવા આવે ત્યારે શહેરજનોએ ફરજિયાત રીતે સુકો અને ભીનો કચરો અલગ આપવાનો રહેશે.
જો કોઈ નાગરિકો આ નિયમોનું પાલન નહીં કરે તો આજથી 10 દિવસ બાદ મ્યુનિસિપલ કોર્પોરેશન દ્વારા કચરો ઉપાડવામાં આવશે નહીં. મ્યુનિસિપલ કોર્પોરેશનના દક્ષિણ પશ્ચિમ ઝોન વિસ્તારમાં સુકો અને ભીનો કચરો અલગ આપે તેના માટે આ કડક નિયમ લાગુ કરવામાં આવ્યો છે. રહેણાંક વિસ્તારના નાગરિકો અને વેપારીઓ તમામ લોકોએ આ નિયમનું પાલન કરવું ફરજિયાત છે.
ભારત સરકારના સોલિડ વેસ્ટ મેનેજમેન્ટ રૂલ્સ 2016 અને 2026 મુજબ, દરેક નાગરિક અને સંસ્થાએ પોતાના કચરાનું વિભાજન કરવું ફરજિયાત છે. આ નિયમ હેઠળ ભીનો કચરો લીલા રંગના ડસ્ટબિનમાં અને સૂકો કચરો વાદળી રંગના ડસ્ટબિનમાં આપવાનો રહેશે. ડોર-ટુ-ડોર કચરો લેવા આવતી ગાડીમાં પણ આ બંને પ્રકારનો કચરો અલગ-અલગ સ્થિતિમાં જ આપવાનો રહેશે.
AMC ના દક્ષિણ પશ્ચિમ ઝોનની સોલિડ વેસ્ટ મેનેજમેન્ટ વિભાગ દ્વારા સત્તાવાર રીતે જાહેરાત કરવામાં આવી છે કે જો કોઈ સોસાયટી કે વેપારી એકમ આ નિયમ તોડશે, તો 10 દિવસ બાદ તેમના ત્યાં કચરો ઉપાડવાની સેવા બંધ કરી દેવામાં આવશે અને જરૂર જણાયે દંડ પણ ફટકારાશે.