અમદાવાદ : અમદાવાદના નરોડામાં નોકરી પરથી પરત ફરી રહેલી યુવતી પર થયેલા રહસ્યમય કેમિકલ એટેકનો ભેદ ક્રાઈમ બ્રાન્ચે ગણતરીના કલાકોમાં ઉકેલી નાખ્યો છે. શરૂઆતમાં પિતા પર શંકા વ્યક્ત કરનાર યુવતી પર હુમલો કરનાર બીજું કોઈ નહીં પણ તેનો પોતાનો જ પતિ હોવાનું બહાર આવ્યું છે. આ ઘટનાને પગલે સમગ્ર વિસ્તારમાં ભારે ચકચાર મચી ગઈ છે. ક્રાઈમ બ્રાન્ચે હાલ પીડિતાના પતિની ધરપકડ કરીને આગળની કાર્યવાહી હાથ ધરી છે.
ઘટનાની વિગત મુજબ, 27મી માર્ચના રોજ નરોડાના ગેલેક્સી વિસ્તારમાં 28 વર્ષીય યુવતી પોતાની નોકરી પૂરી કરી માર્ગ પરથી પસાર થઈ રહી હતી. આ દરમિયાન હેલ્મેટ પહેરીને આવેલા એક અજ્ઞાત બાઈક સવારે તેના પર જ્વલનશીલ કેમિકલ ફેંક્યું હતું. આ હુમલામાં યુવતીને આંખ અને હોઠના ભાગે ગંભીર ઈજાઓ પહોંચતા તેને તાત્કાલિક સારવાર માટે હોસ્પિટલ ખસેડવામાં આવી હતી. શહેરમાં કેમિકલ એટેકની ઘટના બનતા જ સરદારનગર પોલીસ અને ક્રાઈમ બ્રાન્ચની ટીમો એક્શનમાં આવી હતી.
ભોગ બનનાર યુવતીએ પોલીસ ફરિયાદમાં અગાઉના મનદુઃખને કારણે પોતાના પિતા પર શંકા વ્યક્ત કરી હતી. જોકે, ક્રાઈમ બ્રાન્ચને તપાસ દરમિયાન અને સીસીટીવી ફૂટેજમાં પિતાની કોઈ સંડોવણી જણાઈ નહોતી. યુવતીએ તેના પ્રેમ લગ્ન અને પતિ સાથે ચાલતા ઝઘડાનો પણ ઉલ્લેખ કર્યો હોવાથી પોલીસે તેના પતિની આકરી પૂછપરછ કરી હતી. આખરે દબાણ હેઠળ પતિએ કબૂલાત કરી કે પત્નીને પાઠ ભણાવવા માટે તેણે જ આ હુમલો કર્યો હતો.
આરોપીની પૂછપરછમાં સામે આવ્યું કે તેણે વર્ષ 2023માં યુવતી સાથે પ્રેમ લગ્ન કર્યા હતા. પરંતુ લગ્ન બાદ પત્ની વારંવાર તેની મર્દાનગી પર સવાલો ઉઠાવતી હતી અને તેના માતા-પિતા સાથે પણ ઝઘડો કરતી હતી. આ મનમેળ ન હોવાને કારણે પત્ની છેલ્લા 6 મહિનાથી પિયરમાં રહેતી હતી. પોતાની મર્દાનગીનું અપમાન સહન ન થતા આરોપીએ પત્નીનો ચહેરો બગાડવા માટે નરોડા GIDCમાં કામ કરવાના અનુભવને આધારે કેમિકલ લાવી હુમલો કર્યો હતો.
આરોપી પતિ કેટલો ક્રૂર હતો તેનો અંદાજ એ વાત પરથી લગાવી શકાય છે કે હુમલો કર્યા બાદ તે પોતે હોસ્પિટલ પણ ગયો હતો. તે જોવા માંગતો હતો કે તેના હુમલાથી પત્નીને કેટલી ગંભીર ઈજાઓ પહોંચી છે. તપાસમાં એ પણ સામે આવ્યું છે કે જાન્યુઆરી મહિનામાં આરોપી પર પણ કેમિકલ એટેક થયો હોવાની એક અરજી થઈ હતી. હાલમાં પોલીસ એ તપાસ કરી રહી છે કે આ ખતરનાક કેમિકલ તે ક્યાંથી લાવ્યો હતો.