અમદાવાદ: નાગરિકોના આરોગ્ય સાથે ચેડાં કરનાર ખાદ્ય વ્યવસાયીઓ સામે AMCના ફૂડ વિભાગે વધુ એક મોટી કાર્યવાહી હાથ ધરી છે. બાપુનગર વિસ્તારમાંથી લેવામાં આવેલા “બચ્ચો કા પાસ્તા” સ્નેક્સના નમૂનામાં પ્રતિબંધિત Oil Soluble Dye મળી આવતાં તપાસનો દોર અમરાઈવાડી સુધી પહોંચ્યો હતો.
રિપોર્ટ મુજબ, AMCના આરોગ્ય વિભાગના ફૂડ વિભાગે અમરાઈવાડી સ્થિત નાગરવેલ હનુમાન પાસે આવેલ અમન સેલ્સ એજન્સી ખાતે દરોડો પાડી તપાસ હાથ ધરી હતી. તપાસ દરમિયાન વિવિધ પ્રકારના સ્નેક્સનો મોટા પ્રમાણમાં જથ્થો મળી આવ્યો હતો. પ્રાથમિક તપાસમાં આ સ્નેક્સ પણ સબસ્ટાન્ડર્ડ અથવા અસુરક્ષિત હોવાની આશંકા વ્યક્ત થતાં વેચાણ માટે રાખવામાં આવેલા અંદાજે 75 હજાર સ્નેક્સ પેકેટ (લગભગ 1,500 કિલોગ્રામ)નું વેચાણ તાત્કાલિક અસરથી સ્થગિત કરવામાં આવ્યું છે. જથ્થાની અંદાજિત કિંમત રૂ. 3.75 લાખ હોવાનું જણાવાયું છે.
AMCની ટીમે કાર્યવાહી દરમિયાન સંબંધિત એકમને પણ સીલ કરી દીધું છે. ઉપરાંત તપાસ માટે કુલ 7 ખાદ્ય નમૂનાઓ જાહેર આરોગ્ય પ્રયોગશાળામાં મોકલવામાં આવ્યા છે. જેમાં કેચ-અપ કચોરી, સોયા ચિપ્સ, બચ્ચો કા પાસ્તા, બિલુ પોપ કોર્ન, પાસ્તા કા નાસ્તા, મસ્તી કી પાઠશાલા નમકીન અને ગ્રીન એપલ ફ્લેવરની સુગર બોઇલ્ડ કન્ફેક્શનરીનો સમાવેશ થાય છે.
તપાસમાં સામે આવ્યું છે કે આ ઉત્પાદનોનું ઉત્પાદન ધારીવાલા ફૂડ્સ, સુજાનપુર હાઈવે, સિદ્ધપુર (પાટણ) ખાતે કરવામાં આવે છે. તેથી ઉત્પાદન એકમ સામે જરૂરી કાયદેસરની કાર્યવાહી માટે રાજ્ય સરકારના સંબંધિત અધિકારીઓને જાણ કરવામાં આવી છે.