અમદાવાદ : અમદાવાદમાં ભ્રષ્ટાચાર વિરોધી બ્યુરો (ACB)એ લાંચ વિરોધી કાર્યવાહી દરમિયાન અમદાવાદ મ્યુનિસિપલ કોર્પોરેશનના પ્રોપર્ટી ટેક્સ વિભાગમાં ફરજ બજાવતા એક જુનિયર ક્લાર્કને લાંચ લેતા રંગેહાથ ઝડપી પાડ્યો છે. આરોપીએ પ્રોપર્ટી ટેક્સ બિલમાં કબ્જેદાર તરીકે નામ દાખલ કરવાની અરજી મંજૂર કરવા માટે લાંચની માંગણી કરી હતી.
રિપોર્ટ મુજબ, એક અરજદારે તેમની મિલકતના પ્રોપર્ટી ટેક્સ બિલમાં નામ સુધારવા માટે દાણાપીઠ સ્થિત અમદાવાદ મ્યુનિસિપલ કોર્પોરેશનની કચેરીમાં અરજી કરી હતી. આ કામ માટે ત્યાં ફરજ બજાવતા જુનિયર ક્લાર્ક જય કુલકર્ણીએ સરકારી નિયમો મુજબ કામ કરવાના બદલે અરજદાર પાસે 2,000ની લાંચની માંગણી કરી હતી. અરજદાર લાંચ આપવા માંગતા ન હોવાથી તેમણે તુરંત જ એન્ટી કરપ્શન બ્યુરોનો સંપર્ક કર્યો હતો અને આ અંગે વિગતવાર ફરિયાદ નોંધાવી હતી.
ફરિયાદના આધારે ACBની ટીમે તાત્કાલિક વ્યુહરચના ઘડીને દાણાપીઠ AMC કચેરી ખાતે લાંચનું છટકું ગોઠવ્યું હતું. યોજના મુજબ જ્યારે અરજદારે જુનિયર ક્લાર્ક જય કુલકર્ણીને 2,000ની લાંચની રકમ સોંપી, ત્યારે જ અગાઉથી ગોઠવાયેલી ACBની ટીમે દરોડો પાડીને તેને લાંચની રકમ સાથે રંગેહાથ ઝડપી લીધો હતો. ACB એ સ્થળ પરથી જ લાંચની રકમ જપ્ત કરી જય કુલકર્ણીની અટકાયત કરી છે અને તેની સામે ભ્રષ્ટાચાર નિવારણ અધિનિયમ હેઠળ ગુનો નોંધી આગળની કાયદેસરની કાર્યવાહી હાથ ધરી છે.
દાણાપીઠ સ્થિત મધ્યસ્થ કચેરીમાં જ ACB ના દરોડાથી AMC ના અન્ય અધિકારીઓ અને કર્મચારીઓમાં ભારે ફફડાટ વ્યાપી ગયો છે. સામાન્ય નાગરિકોને પોતાના નાનકડા કામ માટે પણ સરકારી કચેરીઓના ચક્કર કાપવા પડે છે અને લાંચ આપવી પડે છે તેવા અનેક આક્ષેપો અવારનવાર થતા રહે છે. ત્યારે ACBની આ કાર્યવાહીથી ભ્રષ્ટ કર્મચારીઓમાં ફફડાટ જોવા મળી રહ્યો છે.