અમદાવાદ : શહેરના વાડજ વિસ્તારમાં ઘરકામ કરતી એક યુવતીએ જ વિશ્વાસનો ભંગ કરી ઘરમાંથી સોના-ચાંદીના દાગીનાની ચોરી કરી હોવાનું સામે આવ્યું છે. વાડજ પોલીસ સ્ટેશનની સર્વેલન્સ ટીમે બાતમીના આધારે આરોપી યુવતીને ઝડપી પાડી રૂ. 1.60 લાખના મુદ્દામાલ સાથે ગુનાનો ભેદ ઉકેલી લીધો છે.
રિપોર્ટ મુજબ, વાડજ પોલીસ સ્ટેશનના પોલીસ ઇન્સ્પેક્ટર એચ.પી. ગરાસિયાના નેતૃત્વમાં ટીમ પેટ્રોલિંગમાં હતી. દરમિયાન મળેલી ચોક્કસ બાતમીના આધારે તપાસ હાથ ધરી ઘરફોડ ચોરીના ગુનામાં સંડોવાયેલી યુવતીને ઝડપી પાડવામાં આવી હતી.પકડાયેલી આરોપીની ઓળખ ઉર્વશી શૈલેષકુમાર પરમાર (ઉંમર 21), રહે. ગાયત્રીનગર, જનતાનગર, અમરાઈવાડી, અમદાવાદ તરીકે થઈ છે. આરોપી ઘરકામનો વ્યવસાય કરતી હોવાનું પોલીસ તપાસમાં સામે આવ્યું છે.
પોલીસે આરોપીના કબજામાંથી બે સોનાની વીંટીઓ, બે જોડી નાની સોનાની બુટ્ટીઓ, બે સોનાના વેઢ તેમજ એક જોડ ચાંદીની પાયલ મળી કુલ રૂ. 1.60 લાખનો મુદ્દામાલ કબજે કર્યો છે.આ અંગે વાડજ પોલીસ સ્ટેશનમાં ભારતીય ન્યાય સંહિતા, 2023ની કલમ 305(એ) હેઠળ નોંધાયેલા ગુનાનો ભેદ ઉકેલી પોલીસે આરોપીની વધુ પૂછપરછ શરૂ કરી છે.