અમદાવાદ : AMCના આરોગ્ય અને ડેઝિગ્નેટેડ ફૂડ સેફ્ટી વિભાગ દ્વારા શહેરીજનોના આરોગ્ય સાથે ચેડાં કરતા તત્વો સામે લાલ આંખ કરાઈ છે. જુલાઈ માસ દરમિયાન ફૂડ ડિપાર્ટમેન્ટ દ્વારા શહેરના વિવિધ ઝોનમાં હાથ ધરાયેલા સઘન ચેકિંગ દરમિયાન ખાદ્ય પદાર્થોના 21 નમૂના લેબોરેટરી ટેસ્ટમાં ફેલ સાબિત થયા છે.
આરોગ્ય વિભાગના રિપોર્ટ અનુસાર, ફૂડ સેફ્ટી વિભાગ દ્વારા શહેરના વિવિધ વિસ્તારોમાંથી હોટેલો, રેસ્ટોરન્ટો, ડેરીઓ અને ખાદ્યપદાર્થ બનાવતા એકમોમાંથી ખાદ્ય સામગ્રીના સેમ્પલ લઈને લેબોરેટરીમાં ચકાસણી અર્થે મોકલવામાં આવ્યા હતા. ફેલ થયેલા નમૂનાઓમાં દૈનિક વપરાશમાં લેવાતા ઘી, બટર, ગાર્લિક પેસ્ટ, વિવિધ ચટણીઓ અને પફનો સમાવેશ થાય છે. સૌથી ગંભીર બાબત એ છે કે અગાઉ જેના નમૂના ફેલ થયા બાદ જથ્થો સીઝ કરવામાં આવ્યો હતો તે ‘બચ્ચો કા પાસ્તા’નો સેમ્પલ વધુ એક વાર ફેલ જાહેર થયો છે. બાળકોના ખોરાક સાથે થઈ રહેલા આવા ચેડાં સામે તંત્ર દ્વારા કાયદેસરની દંડકીય કાર્યવાહી હાથ ધરવામાં આવી છે.
AMC આરોગ્ય વિભાગની ટીમો દ્વારા સમગ્ર જુલાઈ માસ દરમિયાન શહેરના ઉત્તર, દક્ષિણ, પશ્ચિમ અને મધ્ય ઝોનમાંથી કુલ 783 ખાદ્ય સેમ્પલ લેવામાં આવ્યા હતા. લેબોરેટરી પરીક્ષણમાં 21 નમૂના ગુણવત્તાના ધોરણો પર ખરા ન ઊતરતાં ઉત્પાદકો અને વેપારીઓ સામે ફૂડ સેફ્ટી એક્ટ હેઠળ કાર્યવાહી શરૂ કરવામાં આવી છે.