અમદાવાદ : અમદાવાદ શહેરમાં ફરી એકવાર પોલીસ વિભાગને શરમાવવી પડે તેવી ઘટના સામે આવી છે. અમદાવાદ ગ્રામ્ય પોલીસમાં આવતા વિવેકાનંદનગર પોલીસ સ્ટેશનના એક લોકરક્ષક જવાન (LRD)ને 6 હજારની લાંચ લેતા ACB એ રંગેહાથ ઝડપી લીધો છે.દારૂની હેરાફેરીના ખોટા કેસમાં ફસાવી દેવાની ધમકી આપીને આ જવાન તોડબાજી કરી રહ્યો હોવાની હકીકત સામે આવી છે.
રિપોર્ટ મુજબ, ઘટનાની વિગત એવી છે કે, મિતુરાજસિંહે ફરિયાદીને રોકીને તમે ‘દેશી દારૂની હેરાફેરી’ કરો છો, તેવો આક્ષેપ કર્યો હતો. આ અંગે કેસ ન કરવા અને કોઈ હેરાનગતિ ન કરવાના બદલામાં તેણે લાંચની માંગણી કરી હતી. જવાન મિતુરાજસિંહે પોતાના માટે અને અન્ય બે પોલીસકર્મીઓના ભાગ પેટે કુલ 12 હજાર રૂપિયાની લાંચ માંગી હતી.
આ તોડબાજીથી કંટાળીને ફરિયાદીએ ACBનો સંપર્ક કર્યો હતો અને સમગ્ર હકીકત જણાવી હતી. ACB એ ફરિયાદના આધારે છટકું ગોઠવ્યું હતું. અગાઉ નક્કી થયા મુજબ, મિતુરાજસિંહ જ્યારે લાંચની રકમના બાકીના છ હજાર રૂપિયા લેવા માટે દસક્રોઈ તાલુકાના બડોદરા ગામ ચાર રસ્તા પાસે આવ્યો, ત્યારે અગાઉથી જ વોચમાં ઉભેલી ACBની ટીમે તેને લાંચની રકમ સ્વીકારતા રંગેહાથ ઝડપી લીધો હતો.
ACB એ LRD જવાન મિતુરાજસિંહ ચુડાસમાની અટકાયત રી લાંચની રકમ રિકવર કરી છે અને તેની સામે ભ્રષ્ટાચાર નિવારણ અધિનિયમ હેઠળ ગુનો નોંધી વધુ તપાસ હાથ ધરી છે. આ કેસમાં મિતુરાજસિંહે અન્ય બે પોલીસકર્મીઓના નામે પણ પૈસા માંગ્યા હોવાથી, ACB હવે એ દિશામાં પણ તપાસ કરી રહી છે કે ખરેખર અન્ય કયા પોલીસકર્મીઓ આ તોડબાજીના ખેલમાં સામેલ હતા. આ ઘટનાથી પોલીસ બેડામાં ભારે ચકચાર મચી ગઈ છે.