અમદાવાદ : અમદાવાદના ન્યુ રાણીપ વિસ્તારમાં આવેલા કલાસાગર હાઇટ્સ ફ્લેટમાં ચાલતા જુગારધામ પર પીસીબી સ્ક્વોડે દરોડો પાડી આઠ જુગારીની ધરપકડ કરી છે. મકાનમાલિક ગૌતમ પટેલ વ્યક્તિ દીઠ રૂ. 12,000 નાળ લઈને બહારથી લોકોને જુગાર રમવા બોલાવતો હતો. પોલીસે સ્થળ પરથી રૂ. 3.55 લાખ રોકડા, મોબાઈલ અને વાહનો મળી કુલ રૂ. 38.15 લાખનો મુદ્દામાલ કબજે કરી કાયદેસરની કાર્યવાહી હાથ ધરી છે.આ ઘટનામાં ફ્લેટ માલિક ઝડપાઈ ગયો છે, જે પોતાના જ ઘરમાં બહારથી ખેલીઓને બોલાવીને મોટા પાયે જુગાર રમાડતો હતો.
રિપોર્ટ મુજબ, પીસીબીની ટીમ જ્યારે સાબરમતી ન્યૂ રાણીપ વિસ્તારમાં રાત્રિ પેટ્રોલિંગમાં હતી ત્યારે તેમને બાતમી મળી હતી. આ બાતમીના આધારે પોલીસે કલાસાગર હાઈટ્સના બ્લોક નંબર એચ/501માં દરોડા પાડ્યા હતા. પોલીસની ટીમ પાંચમા માળે પહોંચી ત્યારે ફ્લેટનો દરવાજો અડધો ખુલ્લો હતો અને અંદર કેટલાક શખસો જુગાર રમતા રંગેહાથ ઝડપાઈ ગયા હતા. પૂછપરછમાં ફ્લેટના માલિક ગૌતમ કાંતિ પટેલે કબૂલાત કરી હતી કે તે બહારથી લોકોને બોલાવીને એક વ્યક્તિ દીઠ 12,000 રૂપિયા લઈને પોતાના ફ્લેટમાં જુગાર રમાડતો હતો.
પોલીસે ઘટનાસ્થળેથી આરોપીઓ પાસેથી મળેલા રોકડા 3,55,100 રૂપિયા જપ્ત કર્યા હતા. પૂછપરછ દરમિયાન સામે આવ્યું કે, આરોપીઓ જુગારમાં પૈસા હારી જાય તો ગીરવે મૂકીને ફરી રમી શકાય તેવા 10 મોબાઈલ ફોન, 3 ફોર વ્હીલર અને 1 ટુ વ્હીલર પણ કબજે કરવામાં આવ્યા છે. આ રેડમાં જુગાર રમવાના 104 પાના, 13 કોરી ચેક સ્લિપ, 4 ગાદલા, એક એલ્યુમિનિયમનું તગારું અને પુરાવા રૂપે એક લાઈટબિલ પણ મળી આવ્યું હતું. પોલીસે કુલ 38,15,100 રૂપિયાના મુદ્દામાલ સાથે પકડાયેલા ફ્લેટ માલિક અને અન્ય આરોપીઓ સામે ગુનો નોંધ્યો છે.
પોલીસે તમામ આરોપીઓ સામે કાયદેસરની કાર્યવાહી હાથ ધરી છે. જુગારધામ કેટલા સમયથી ચાલતું હતું અને તેમાં અન્ય કોઈ વ્યક્તિની સંડોવણી છે કે કેમ તે અંગે પણ તપાસ કરવામાં આવી રહી છે.
પકડાયેલા આઠ આરોપીઓ
ગૌતમ કાંતિભાઈ પટેલ (ઉં.વ. 38, રહે. ન્યુ રાણીપ)
શશી રમેશભાઈ પટેલ (ઉં.વ. 46, રહે. જગતપુર, ચાંદખેડા)
મનદીપ કિરીટભાઈ પટેલ (ઉં.વ. 34, રહે. જગતપુર, ચાંદખેડા)
મિત ભરતભાઈ પટેલ (ઉં.વ. 32, રહે. ન્યુ રાણીપ)
અંકિત જયંતીભાઈ પટેલ (ઉં.વ. 40, રહે. નારણપુરા)
પ્રિયાંક ચીનુભાઈ સોની (ઉં.વ. 42, રહે. સાયન્સ સિટી રોડ, સોલા)
શૈલેષ હસમુખલાલ પંડ્યા (ઉં.વ. 48, રહે. ન્યુ રાણીપ)
વિરલ ઘનશ્યામભાઈ સોની (ઉં.વ. 33, રહે. ગોતા, સોલા)