અમદાવાદ : અમદાવાદના સૌથી વ્યસ્ત એસજી હાઈવે પર ગોતા તરફથી હાઇકોર્ટ જવાના માર્ગે ઓવરબ્રિજ નજીક રોડ પર મોટો ભૂવો પડ્યો છે. ભૂવો પડતા વાહનચાલકો માટે જોખમ ઉભું થયું હતું. ઘટનાની જાણ થતાં AMCની ટીમે તાત્કાલિક સ્થળ પર બેરિકેડ લગાવી વિસ્તારને કોર્ડન કર્યો હતો. વરસાદી સિઝનમાં સતત ભૂવા પડવાની ઘટનાઓ સામે આવી રહી છે.
રિપોર્ટ મુજબ, અમદાવાદ મ્યુનિસિપલ કોર્પોરેશન એટલે કે AMCની ટીમ દ્વારા ભૂવો પડ્યાની જાણ થતાં તાત્કાલિક સ્થળ પર બેરિકેડ લગાવી વિસ્તારને કોર્ડન કરવામાં આવ્યો હતો. વાહનચાલકોની સુરક્ષાને ધ્યાનમાં રાખીને ભૂવા આસપાસનો માર્ગ સુરક્ષિત કરવામાં આવ્યો છે, જેથી કોઈ અકસ્માત ન સર્જાય.
મહત્વનું છે કે અમદાવાદમાં વરસાદી સિઝન દરમિયાન રોડ પર ભૂવા પડવાની ઘટનાઓ સતત સામે આવી રહી છે. અત્યાર સુધીમાં આ ચોમાસાની સિઝનમાં શહેરમાં 20 જેટલા ભૂવા પડી ચૂક્યા છે, જેના કારણે રોડની ગુણવત્તા અને વરસાદી પાણીના નિકાલની વ્યવસ્થા સામે પણ સવાલો ઊભા થઈ રહ્યા છે.
હવે SG હાઈવે જેવા શહેરના અત્યંત વ્યસ્ત માર્ગ પર ભૂવો પડતાં AMCની કામગીરી સામે પણ સવાલો ઉઠી રહ્યા છે. તંત્ર દ્વારા ભૂવાનું કારણ શોધવાની સાથે રોડનું સમારકામ ક્યારે કરવામાં આવશે અને વાહનચાલકો માટે રસ્તો સંપૂર્ણપણે ક્યારે સુરક્ષિત બનશે તે જોવું મહત્વપૂર્ણ રહેશે.