અમદાવાદ : અમદાવાદ મ્યુનિસિપલ કોર્પોરેશનના ફૂડ વિભાગ દ્વારા નાગરિકોના આરોગ્ય સાથે ચેડા કરનાર ધંધાકીય એકમો સામે કાર્યવાહી કરવામાં આવી છે. ફૂડ વિભાગ દ્વારા એનાલોગ પનીર અને બટરનો ઉપયોગ, હળદરમાં વધુ પ્રમાણમાં સ્ટાર્ચ, વધુ પડતા પડેલા બળેલા તેલનો ઉપયોગ સહિત ગંદકી બદલ 6 એકમને સીલ કરવાની કાર્યવાહી કરવામાં આવી છે.
રિપોર્ટ મુજબ, અમદાવાદ મ્યુનિસિપલ કોર્પોરેશનના ફૂડ વિભાગ દ્વારા નવરંગપુરાના સી.જી. રોડ/એચ.એલ. કોલેજ રોડ પર આવેલા અતિ લોકપ્રિય ‘HL ફ્રેન્કી’, ‘દિલ્હી પરાઠા’ અને ગીતામંદિર બસ સ્ટેન્ડ નજીક આવેલા ‘જય સોમનાથ ટી સ્ટોલ’ ખાતે પીરસવામાં આવતું પનીર વાસ્તવમાં શુદ્ધ પનીર નહીં પરંતુ કેમિકલ અને વેજિટેબલ ફેટથી બનેલું ‘એનાલોગ પનીર’ હતું. રિપોર્ટ નેગેટિવ આવતાં જ AMC ની ટીમે ત્વરિત કાર્યવાહી કરીને આ ત્રણેય એકમોને વિધિવત રીતે સીલ કરી દીધા છે.
બીજી તરફ, AMC ના ફૂડ અધિકારીઓની ટીમે દાણીલીમડા વિસ્તારમાં આવેલી ‘એશિયન બેકરી’ પર અચાનક સરપ્રાઇઝ ચેકિંગ હાથ ધર્યું હતું. તપાસ દરમિયાન માલુમ પડ્યું હતું કે આ બેકરી કોઈપણ જાતના ફૂડ સેફ્ટી લાયસન્સ વગર ગેરકાયદેસર અને અત્યંત અસ્વચ્છ વાતાવરણમાં ચલાવવામાં આવી રહી હતી.AMC ની ટીમે સ્થળ પરથી 5,700 કિલોગ્રામ મેંદો અને ખાંડનો જથ્થો તેમજ બ્રેડ બનાવવા માટે અગાઉથી કાળો પડી ગયેલો 200 કિલોગ્રાામ કણક (બાંધેલો લોટ) જપ્ત કરી તુરંત જ નાશ કરાવ્યો હતો. ફૂડ સેફ્ટી એક્ટના ઉલ્લંઘન બદલ એશિયન બેકરીને પણ સ્થળ પર જ સીલ કરી દેવામાં આવી છે.
વટવા વિસ્તારમાં જાનકી એન્ટરપ્રાઈઝના રીટેલ યુનિટ પ્રાઈવેટ લિમિટેડમાંથી લીધેલા હળદરના નમૂનામાં સ્ટાર્ચનું પ્રમાણ વધારે મળી આવ્યું હતું. જેના પગલે કુબેરનગરના પીએમ ફૂડ્સમાં તપાસ કરી અને હળદર તેમજ મરચું સહિત મસાલાનો જથ્થો જપ્ત કરવામાં આવ્યો છે.હળદર પાવડરમાં સ્ટાર્ચનું પ્રમાણ વધુ મળતા રી-પેકર યુનિટ પર કાર્યવાહી કરવામાં આવી હતી.
આ ઉપરાંત શહેરના પ્રહલાદનગર વિસ્તારમાં પુષ્પક કોમ્પ્લેક્સ પાસે આવેલા KFCમાં ફૂડ વિભાગની ટીમ દ્વારા તેલનું ચેકિંગ કરવામાં આવ્યું હતું. જેમાં TPC એટલે કે બળતણનું પ્રમાણ ચેક કરવામાં આવતા વધારે મળી આવ્યું હતું. જેથી તેને સીલ કરવાની કાર્યવાહી કરવામાં આવી હતી.
AMC ફૂડ વિભાગ દ્વારા ખાદ્ય એકમોમાં હાઇજેનિક કન્ડિશન અને લાઇસન્સનું સઘન ચેકિંગ કરવામાં આવી રહ્યું છે. નિયમોનું પાલન નહીં કરનાર એકમો સામે FSSA અને GPMC એક્ટ હેઠળ કડક કાર્યવાહી કરવાની ચેતવણી આપવામાં આવી રહી છે.