અમદાવાદ : અમદાવાદમાં ડિજિટલ યુગ સાથે વધી રહેલા સાયબર ગુનાઓ અને ખાસ કરીને મહિલાઓને નિશાન બનાવી થતી ઓનલાઇન હેરાનગતિ સામે અમદાવાદ સાયબર ક્રાઇમ બ્રાન્ચે કાર્યવાહી વધુ તેજ કરી છે. પોલીસ કમિશનર અનુપમસિંહ ગેહલોતની સૂચનાથી મહિલાઓની ઓનલાઇન સુરક્ષા માટે ‘મિશન સાયબર રક્ષિકા’ સ્ક્વોડની રચના કરવામાં આવી છે.
રિપોર્ટ મુજબ, જે અંતર્ગત ગત જુલાઈ માસ દરમિયાન જ સાયબર ક્રાઇમ સ્ટેશનમાં 11 જેટલી ગંભીર ફરિયાદો મળી હતી. આ ફરિયાદોમાં મહિલાઓના ફેક સોશિયલ મીડિયા આઈડી બનાવી તેમને બદનામ કરવા, ન્યૂડ ફોટા અને વીડિયો મોકલી માનસિક ત્રાસ આપવો તેમજ બ્લેકમેઇલ કરીને પૈસાની ઉઘરાણી કરવાના આરોપો હતા. પોલીસ કમિશનર દ્વારા આ મામલે 8 પી.આઈ. સહિત ઉચ્ચ અધિકારીઓની સ્પેશિયલ ઇન્વેસ્ટિગેશન ટીમ બનાવીને તપાસનો ધમધમાટ શરૂ કરાયો હતો. ટેકનિકલ સર્વેલન્સ અને આઈપી એડ્રેસના આધારે સાયબર ટીમે ગુજરાતના વિવિધ જિલ્લાઓ ઉપરાંત પડોશી રાજ્ય રાજસ્થાનમાં દરોડા પાડી 1 મહિલા અને 7 પુરુષો મળી કાયદેસર રીતે કુલ 8 આરોપીઓની ધરપકડ કરી છે.
પોલીસ તપાસમાં સામે આવ્યું છે કે કેટલાક આરોપીઓ મહિલાઓના નામે ફેક સોશિયલ મીડિયા એકાઉન્ટ બનાવીને અન્ય મહિલાઓ સાથે સંપર્ક કરતા હતા. ત્યારબાદ વાતચીત દરમિયાન તેમના અંગત ફોટા અને વીડિયો મેળવી તેને વાયરલ કરવાની ધમકી આપવામાં આવતી હતી. કેટલાક કિસ્સાઓમાં આરોપીઓ પૈસાની માંગણી કરતા હતા, જ્યારે અન્ય કેસોમાં મહિલાઓના લગ્નજીવનમાં તણાવ ઊભો કરવા માટે તેમને સતત માનસિક ત્રાસ આપવામાં આવતો હતો.
પોલીસ તપાસમાં સામે આવ્યું છે કે મોટાભાગના કિસ્સાઓમાં ફરિયાદી મહિલાઓના નજીકના ઓળખીતાઓ અથવા તો તેમના અગાઉના બોયફ્રેન્ડ જ બદલો લેવાની કે બ્લેકમેઇલ કરવાની દાનતથી આરોપી નીકળ્યા હતા.પકડાયેલા આરોપીઓ પૈકી બે આરોપીઓ અત્યંત વિકૃત માનસિકતા ધરાવતા હતા. સ્નેપચેટ, ઇન્સ્ટાગ્રામ અને ફેસબુક જેવા માધ્યમો પર કોઈપણ મહિલા કે યુવતીનું એકાઉન્ટ જોઈને તેમને ટાર્ગેટ કરી હેરાનગતિ કરવી એમની ટેવ બની ગઈ હતી.
પોલીસ કમિશનર અનુપમસિંહ ગેહલોતે મહિલાઓને અપીલ કરી છે કે સોશિયલ મીડિયા અથવા અન્ય ઓનલાઇન પ્લેટફોર્મ પર કોઈ અજાણી વ્યક્તિ અનિચ્છનીય મેસેજ, ફોટો કે વીડિયો મોકલીને હેરાન કરતી હોય અથવા ધમકી આપતી હોય તો ઘટનાને અવગણવાને બદલે તાત્કાલિક સાયબર ક્રાઇમ બ્રાન્ચનો સંપર્ક કરવો.
મિશન સાયબર રક્ષિકા સ્ક્વોડ દ્વારા ફરિયાદ કરનાર મહિલાઓની ઓળખ અને વિગતોની સંપૂર્ણ ગુપ્તતા જાળવવામાં આવશે તેવી ખાતરી પણ પોલીસ દ્વારા આપવામાં આવી છે.
સોશિયલ મીડિયા સુરક્ષા માટે પોલીસની સલાહ
પોલીસે મહિલાઓ સહિત તમામ સોશિયલ મીડિયા યુઝર્સને પોતાના એકાઉન્ટની સુરક્ષા અંગે સાવચેતી રાખવા અપીલ કરી છે.
સોશિયલ મીડિયા એકાઉન્ટના તમામ સિક્યુરિટી અને પ્રાઇવસી ફીચર્સ સક્રિય રાખવા.
અજાણ્યા વ્યક્તિઓની ફ્રેન્ડ અથવા ફોલો રિક્વેસ્ટ સ્વીકારવી નહીં.
અંગત માહિતી, ફોટા કે વીડિયો અજાણ્યા લોકો સાથે શેર ન કરવા.
શંકાસ્પદ એકાઉન્ટ અથવા મેસેજથી સાવચેત રહેવું.
ઓનલાઇન ધમકી કે બ્લેકમેઇલિંગ થાય તો પુરાવા સાચવીને તાત્કાલિક પોલીસનો સંપર્ક કરવો.
‘મિશન સાયબર રક્ષિકા’ દ્વારા કરવામાં આવેલી કાર્યવાહીથી મહિલાઓને નિશાન બનાવી ઓનલાઇન ગુનાઓ આચરતા તત્વો સામે અમદાવાદ પોલીસનો કડક અભિગમ સ્પષ્ટ થયો છે.