અમદાવાદ : સોલા હાઇકોર્ટ પોલીસે અમદાવાદ શહેરના વિવિધ વિસ્તારોમાંથી ચોરાયેલી છ મોંઘાદાટ અને કિંમતી સ્પોર્ટ્સ બાઇકનો ભેદ ઉકેલી એક આરોપીને ઝડપી લીધો છે. પોલીસે 21 વર્ષીય રીઢા બાઇક ચોર વિકાસ પરમાર પાસેથી કુલ રૂ. 4.70 લાખની કિંમતની છ ચોરાયેલી મોટરસાયકલ કબજે કરી છે. મૂળ ડુંગરપુર, રાજસ્થાનનો રહેવાસી અને હાલ ઘાટલોડિયા ખાતે રહેતો આ આરોપી પોતાની પાસે ચોરીની બાઇક રાખીને ફરતો હતો, ત્યારે જ પોલીસના હાથમાં ઝડપાઈ ગયો હતો.
રિપોર્ટ મુજબ, સોલા-સતાધાર બ્રિજ પાસે સોસાયટી બહારથી બજાજ પલ્સર-180 મોટરસાયકલની ચોરી અંગેનો ગુનો વણશોધાયેલ હતો. આ કેસની તપાસ દરમિયાન ઘટનાસ્થળના સીસીટીવી ફૂટેજના આધારે બાઇક ચોરની ઓળખ કરવામાં આવી હતી. મળેલી ચોક્કસ બાતમીના આધારે પોલીસે ગોતા સિલ્વર ઓક કોલેજ ચાર રસ્તા પાસેથી મોટરસાયકલ સાથે વિકાસ પરમાર (ઉં.વ. 21), વ્યવસાયે મજૂરી, હાલ મેમનગર-ઘાટલોડિયા, અમદાવાદને ઝડપી લીધો હતો.બાઇકના કાગળો માંગતા તે ગલ્લાંતલ્લાં કરવા લાગ્યો હતો.
પોલીસે યુક્તિપૂર્વક સઘન પૂછપરછ કરતાં તેણે બાઇક ચોરીનું હોવાની કબૂલાત કરી હતી.પોલીસની કડક પૂછપરછ દરમિયાન આરોપીએ ચોંકાવનારો ખુલાસો કર્યો હતો. તે પોતાના મિત્ર સાથે મળીને અમદાવાદના અલગ-અલગ વિસ્તારોમાં રેકી કરીને ડુપ્લિકેટ ચાવી વડે સ્પોર્ટ્સ બાઇકની ચોરી કરતો હતો. ચોરી કર્યા બાદ વાહનોને પકડાઈ જવાના ડરથી AMC ના પાર્કિંગમાં દીવાલની આડમાં સંતાડી દેતા હતા. આરોપીની કબૂલાતના આધારે પોલીસે વધુ 5 બાઇક શોધી કાઢી હતી.
પોલીસે કબજે કરેલી છ મોટરસાયકલોમાં વાસણા વિસ્તારમાંથી ચોરાયેલી યામાહા R15-M, વાડજમાંથી ચોરાયેલી યામાહા R15, સોલા વિસ્તારમાંથી ચોરાયેલી બજાજ પલ્સર-180, ગુજરાત યુનિવર્સિટી વિસ્તારમાંથી ચોરાયેલી યામાહા R15, વસ્ત્રાપુરમાંથી ચોરાયેલી હીરો HF ડિલક્સ અને આનંદનગરમાંથી ચોરાયેલી બજાજ પલ્સર RS-200નો સમાવેશ થાય છે.
આ છ બાઇક ચોરીના ગુનાઓ પૈકી સોલા હાઇકોર્ટ, વાસણા, વાડજ, ગુજરાત યુનિવર્સિટી, વસ્ત્રાપુર અને આનંદનગર પોલીસ સ્ટેશનમાં એક-એક ગુનો નોંધાયેલો હતો. આ રીતે પોલીસે અલગ-અલગ પોલીસ સ્ટેશનના કુલ છ બાઇક ચોરીના ગુનાઓનો ભેદ ઉકેલ્યો છે.
આરોપીઓ આ મોંઘાદાટ બાઇક્સ અમદાવાદ શહેરના અલગ-અલગ વિસ્તારોમાંથી ચોરી કરીને પોતાના વતન રાજસ્થાન ખાતે ઓછા ભાવે વેચી દેતા હતા. આરોપી વિકાસ પરમાર સામે અગાઉ પણ વાહન ચોરીના 6 ગુના નોંધાઈ ચૂક્યા છે. પોલીસે હાલ રૂ. 4.70 લાખની મત્તાની કુલ 6 મોટરસાઇકલ કબ્જે કરીને ફરાર સહ-આરોપીને ઝડપી લેવા ચક્રો ગતિમાન કર્યા છે.