અમદાવાદ : અમદાવાદ શહેરના પોશ ગણાતા ગોતા વિસ્તારમાંથી એક ચોંકાવનારી ચોરીની ઘટના સામે આવી છે. ગોતા વિસ્તારમાં વંદેમાતરમ રોડ પર આવેલી બ્રાન્ડેડ શોરૂમમાંથી સોનાની મોંઘી ઘડિયાળ ચોરી કરનાર આરોપીને સોલા હાઇકોર્ટ પોલીસે ગણતરીના કલાકોમાં ઝડપી પાડ્યો છે. પોલીસે આરોપી પાસેથી રૂ. 2,02,400ની કિંમતની ચોરાયેલી સોનાની ઘડિયાળ પણ કબજે કરી છે.
રિપોર્ટ મુજબ, અમદાવાદના ગોતા વિસ્તારમાં વંદેમાતરમ રોડ પર આવેલો ઘડિયાળનો જાણીતો “ટાઇટન વર્લ્ડ એન્ડ ફાસ્ટ્રેક” શોરૂમમાં પોતાની પત્ની માટે ઘડિયાળ પસંદ કરવાના બહાને જોવાનું શરૂ કર્યું હતું. આ દરમિયાન સ્ટાફની નજર ચૂકવીને તેણે ટાઇટન કંપનીની ‘નેબ્યુલા’ મોડેલની રૂ. 2.02 લાખની લેડીઝ વોચની ચોરી કરી હતી.
ઘડિયાળ ગાયબ જણાઈ આવતાં શોરૂમ માલિક બળવંતભાઈએ સોલા પોલીસ સ્ટેશનમાં ગુનો નોંધાવ્યો હતો. પોલીસે હ્યુમન ઇન્ટેલિજન્સ સોર્સ સક્રિય કરી ઘટનાસ્થળના CCTV ફૂટેજ તપાસ્યા હતા.દરમિયાન પોલીસને મળેલી ચોક્કસ બાતમીના આધારે સોલા વિવાંતા હોટલની બહાર એએમટીએસ બસ સ્ટેન્ડ નજીકથી આરોપી પ્રદીપ નાયકની ધરપકડ કરી છે.
આ અગાઉ સ્ટોરમાં ટેકનિશિયન તરીકે કામ કરી ચૂકેલો પ્રદીપ નાયક સ્ટોરના વાતાવરણ, કાઉન્ટર વ્યવસ્થા અને કિંમતી કલેક્શનની જગ્યાથી સારી રીતે વાકેફ હતો. પૂર્વ કર્મચારી હોવાના નાતે શોરૂમના વર્તમાન સ્ટાફ સાથે તેનો સારો પરિચય હતો. આ પરિચય અને વિશ્વાસનો ગેરલાભ ઉઠાવીને તેણે આયોજનબદ્ધ રીતે ચોરીને અંજામ આપવાની યોજના બનાવી હતી.