અમદાવાદ : અમદાવાદ શહેરમાં પણ મેઘરાજાએ મહેરબાન થવાનું શરૂ કર્યું છે. બફારા અને અસહ્ય ઉકળાટથી ત્રાસી ગયેલા શહેરીજનો માટે રાહતના સમાચાર આવ્યા છે. અમદાવાદ શહેરના અનેક મહત્વપૂર્ણ વિસ્તારોમાં અચાનક આકાશ ઘેરાયા બાદ વરસાદી ઝાપટાં અને ધોધમાર વરસાદ શરૂ થઈ ગયો હતો.
અમદાવાદ શહેરના પશ્ચિમ વિસ્તારમાં મેઘરાજાએ જોરદાર એન્ટ્રી કરી છે. વસ્ત્રાપુર, સેટેલાઈટ અને શ્યામલ જેવા વ્યસ્ત વિસ્તારોમાં વરસાદ વરસતા રસ્તાઓ પર ઠંડક પ્રસરી ગઈ હતી. આ ઉપરાંત વેજલપુર અને પાલડી વિસ્તારમાં પણ વરસાદી ઝાપટાં પડ્યા હોવાના અહેવાલ છે, જેના કારણે ઓફિસેથી ઘરે પરત ફરતા નોકરિયાતો અને વાહનચાલકોને થોડી રાહતની સાથે મનમોહક વાતાવરણ જોવા મળ્યું હતું.
માત્ર પશ્ચિમ વિસ્તાર જ નહીં, પરંતુ પૂર્વ અને મધ્ય અમદાવાદના વિસ્તારોમાં પણ મેઘરાજાએ પોતાની હાજરી નોંધાવી છે. મણિનગર, સીટીએમ અને ખોખરા વિસ્તારમાં પણ વરસાદ વરસ્યો હતો. લાંબા સમયથી વરસાદ ખેંચાવાના કારણે શહેરમાં જે પ્રકારનો ઉકળાટ અને ગરમી અનુભવાતી હતી, તેનાથી નાગરિકોને મોટી રાહત અનુભવાઈ છે.
અમદાવાદના પૂર્વ અને પશ્ચિમના અનેક વિસ્તારોમાં અચાનક શરૂ થયેલા આ વરસાદને કારણે નોકરીથી ઘરે પરત ફરતા વાહનચાલકો અને રાહદારીઓને ભારે મુશ્કેલીનો સામનો કરવો પડ્યો છે. હવામાન વિભાગની આગાહી સાચી સાબિત થતી હોય તેમ શહેરના અનેક ભાગોમાં પાણી ભરાયા છે અને ટ્રાફિક જામની સમસ્યા પણ સર્જાઈ છે.
અચાનક આવેલા આ વરસાદના કારણે અમદાવાદ શહેરના તાપમાનમાં ઘટાડો નોંધાયો છે અને ઠંડો પવન ફૂંકાતા વાતાવરણ આહલાદક બન્યું છે. હવામાન વિભાગના જણાવ્યા અનુસાર, આગામી સમયમાં પણ શહેરમાં છૂટાછવાયા વિસ્તારોમાં વરસાદી માહોલ યથાવત રહી શકે છે.