ગાંધીનગર : ગાંધીનગરમાં લાંચ રુશ્વત વિરોધી બ્યુરો (ACB) એ એક સફળ ટ્રેપ ગોઠવીને સ્ટેટ ઇન્ટેલીજન્સ બ્યુરો (SIB) ના એક ઉચ્ચ અધિકારીને લાંચ લેતા ઝડપી પાડ્યા છે. સીનીયર ઇન્ટેલીજન્સ ઓફિસર કેતનભાઈ દવે રૂ.80 હજારની લાંચ સ્વીકારતા એસીબીના હાથે રંગેહાથ પકડાઈ જતાં પોલીસ બેડામાં ભારે ચકચાર મચી ગઈ છે.
પ્રાપ્ત રિપોર્ટ મુજબ, ફરિયાદીએ પોલીસ પ્રોટેક્શન માટે અરજી કરી હતી. આ અરજીમાં પોઝિટિવ અભિપ્રાય આપવાના બદલામાં અધિકારીએ લાંચની માંગણી કરી હતી. સિનિયર ઇન્ટેલિજન્સ (સ્ટેટ IB) ઓફિસર કેતન દવે ફરિયાદીનું કામ કરી આપવા માટે રૂ 80,000ની માંગણી કરી હતી. ફરિયાદી લાંચ આપવા માંગતા ન હોવાથી તેમણે ACBનો સંપર્ક કર્યો અને સરગાસણ ચોકડી પાસે છટકું ગોઠવવામાં આવ્યું. ACBએ લાંચની રકમ સાથે કેતન દવેને કસ્ટડીમાં લીધા છે. હાલમાં તેમની સામે ગુનો નોંધીને વધુ તપાસ હાથ ધરવામાં આવી છે કે, આમાં અન્ય કોઈની સંડોવણી છે કે નહીં તે દીશામાં તપાસ ચાલી રહી છે.
ગુજરાતમા ACB વિભાગ લાંચને લઈ સતર્ક છે,જો તમારી પાસે કોઈ અધિકારી કામ કરાવવાને લઈ લાંચ માંગે તો તમે એસીબીનો સંપર્ક કરી શકો છે 1064 આ નંબર એસીબીનો ટોલ ફ્રી નંબર છે જેમાં તમે અધિકારીનું નામ અને જે જગ્યાએ ફરજ બજાવતા હોય તેની વિગત આપી શકો છો ત્યારબાદ એસીબી તમારો સંપર્ક કરશે અને ટ્રેપ સફળ બનાવી શકે છે.