અમદાવાદ : ગુજરાતમાં અવારનવાર અકસ્માતની ઘટનાઓ સામે આવતી હોય છે. અમદાવાદ સહિત રાજ્યભરમાં અકસ્માતનો કહેર જોવા મળી રહ્યો છે. ગમખ્વાર અકસ્માતમાં અનેક લોકોએ પોતાનો જીવ ગુમાવ્યો છે. ત્યારે ડ્રાય સ્ટેટ કહેવાતા ગુજરાતમાં પણ દારુના નશામાં બેફામ કાર ચલાવતા નબીરાઓ અકસ્માત સર્જ્યો છે. ત્યારે નવા વાડજ વિસ્તારમાં અખબારનગર સર્કલ પાસે વધુ એક કાર ચાલકે નશામાં આતંક મચાવ્યો હોવાનું સામે આવ્યું છે.જોકે, ટ્રાફિક પોલીસ દ્વારા કારચાલકની અટકાયત કરાઈ છે.
પ્રાપ્ત રિપોર્ટ મુજબ, મંગળવારે મોડી રાતે શહેરના અખબારનગર અંડરપાસ નજીક નશાખોર કારચાલકે બેફામ ડ્રાઈવિંગથી અકસ્માત સર્જ્યો હતો. કારચાલકે ટુવ્હિલરને અડફેટે લેતા ટુવ્હિલર ચાલકને સામાન્ય ઈજા પહોંચી છે. કારચાલક પસાર થઈ રહ્યો હતો તે દરમિયાન કારચાલકે અખબારનગર અંડરપાસના ગેટ સાથે કાર અથડાવી અને એક્ટિવ ચાલકને અડફેટે લીધો હતો. કોર્પોરેશનની પ્રોપર્ટીને પણ કારચાલક દ્વારા નુકસાન પહોંચાડવામાં આવ્યું છે. ત્યારબાદ સ્થાનિકો દ્વારા કારચાલકને પકડી લેવાયો હતો. તે નશાની હાલતમાં હોવાનું સામે આવ્યું છે. જોકે, ટ્રાફિક પોલીસ દ્વારા કાર ચાલકની અટકાયત કરાઈ છે.