અમદાવાદ : શહેરના પૂર્વ વિસ્તારમાં આવેલા ઓઢવ ખાતે એક વિચિત્ર ઘટના બની છે. શહેરમાં વગર ચોમાસે AMTS બસ કોર્પોરેશન દ્વારા ખોદવામાં આવેલા ખાડામાં જ ફસાઈ ગઈ હતી. ‘ જે ખાડો ખોદે તે જ તેમાં પડે’ જેવો ઘાટ આ ઘટનામાં સર્જાયો હતો. AMC દ્વારા કોઈ કામગીરી માટે ખોદવામાં આવેલા ખાડા પર યોગ્ય બેરિકેડિંગ કે માર્ગદર્શનના અભાવે આ અકસ્માત થયો હતો.
પ્રાપ્ત રિપોર્ટ મુજબ, અમદાવાદના પૂર્વમાં ઓઢવમાં ચાર રસ્તા પર AMTS બસ ખાડામાં ફસાઈ ગઈ હતી. આ ઘટના AMC ના અણધાર્યા ખોદકામના પરિણામે બની હતી, જેના કારણે રસ્તા પર ખાડો થઈ ગયો અને AMTS ની બસ તેમાં ફસાઈ ગઈ હતી. બસને બહાર કાઢવાની તજવીજ હાથ ધરવામાં આવી હતી. આ ઘટનામાં સદનસીબે જાનહાનિ ટળી હતી. AMC દ્વારા કોઈ કામગીરી માટે ખોદવામાં આવેલા ખાડા પર યોગ્ય બેરિકેડિંગ કે માર્ગદર્શનના અભાવે આ અકસ્માત થયો હતો.
આ ઘટનાથી ઓઢવનો મુખ્ય ચાર રસ્તો લગભગ ત્રણ કલાક સુધી પૂર્ણપણે બંધ રહ્યો. વાહનોની કિલોમીટરો લાંબી કતારો લાગી અને લોકોએ ગંતવ્ય સુધી પહોંચવા વૈકલ્પિક રસ્તાઓનો સહારો લીધો. ટ્રાફિક પોલીસે મોડેથી પહોંચીને વ્યવસ્થા સંભાળી ત્યાર બાદ AMTS બસને બહાર કાઢી, જેમાં બસનું આગળનું એક્સલ અને ચેસિસને ભારે નુકસાન થયું છે.
સ્થાનિક રહેવાસીઓએ આક્રોશ વ્યક્ત કરતાં કહ્યું કે, “આ વિસ્તારમાં છેલ્લા એક મહિનાથી સીવરનું કામ ચાલે છે, પણ રાત્રે ખોદીને જેમ તેમ પુરાણ કરી દેવામાં આવે છે અથવા સવારે ખાડા ખુલ્લા છોડી દે છે. આજે બસ ફસાઈ, કાલે કોઈનો જીવ જઈ શકે.”