અમદાવાદ : હોળીના તહેવાર પૂર્વે ખાદ્ય પદાર્થોમાં ભેળસેળ કરવામાં આવતી હોઈ અમદાવાદ મ્યુનિસિપલ કોર્પોરેશન (AMC)ના ફૂડ વિભાગે શહેરભરમાં ખાસ ચકાસણી અભિયાન હાથ ધર્યું છે. તહેવાર દરમિયાન વધતા ખાદ્ય પદાર્થોના વેચાણને ધ્યાનમાં રાખીને વિવિધ શાળાઓ અને હેલ્થ વિભાગ દ્વારા આજે(20 ફેબ્રુઆરી, 2026) શહેરના વિવિધ ઝોનમાં ચેકિંગ હાથ ધરવામાં આવ્યું હતું. જેમાં ફૂડ ડિપાર્ટમેન્ટની ટીમોએ અલગ-અલગ વોર્ડ વિસ્તારમાં આવેલા 22 એકમો પર દરોડા પાડ્યા હતા.
પ્રાપ્ત વિગતો મુજબ, AMCના ફૂડ વિભાગ દ્વારા AMC સંચાલિત શાળાઓમાં આપવામાં આવતા મધ્યાહન ભોજનની ગુણવત્તા ચકાસવા માટે જમાલપુર વિસ્તારમાં આવેલી મ્યુનિસિપલ શાળા નંબર 5 અને જમાલપુર ઉર્દૂ શાળા નંબર 5માંથી નમૂનાઓ લીધા હતા. બંને શાળાઓમાંથી સુખડી અને રોટલીના સેમ્પલ લેવામાં આવ્યા હતા.આ ઉપરાંત શહેરના અલગ-અલગ વિસ્તારોના 22 જેટલાં એકમોમાં દરોડા પાડી તપાસ હાથ ધરી હતી. આ દરમિયાન શંકાસ્પદ જણાતા કુલ 42 ખાદ્ય ચીજવસ્તુઓના નમૂના લઈ તપાસ અર્થે પબ્લિક હેલ્થ લેબોરેટરીમાં મોકલી આપવામાં આવ્યા છે.
આ ઉપરાંત, શહેરના લોકપ્રિય લક્ષ્મી ગાંઠિયા રથમાંથી ગાંઠિયા, જલેબી અને ફાફડાના નમૂનાઓ લેવામાં આવ્યા હતા. આશ્રમ રોડ પર આવેલી ફૂડ ઇન હોટલમાંથી પણ ખાદ્ય પદાર્થોના સેમ્પલ એકત્રિત કરવામાં આવ્યા હતા.આ ઉપરાંત, આરોગ્યના નિયમોનું ઉલ્લંઘન કરનારા 7 એકમો પાસેથી રૂ.53,000નો દંડ વસૂલવામાં આવ્યો હતો.
AMCના અધિકારીઓએ નાગરિકોને સ્વચ્છ અને ગુણવત્તાયુક્ત ખાદ્ય પદાર્થોનો ઉપયોગ કરવા તેમજ શંકાસ્પદ ખાદ્ય પદાર્થો અંગે તંત્રને જાણ કરવા અપીલ કરી છે.