અમદાવાદ : અમદાવાદના બોપલ અને શેલા વિસ્તારમાં ‘અક્ષર અનંત’ પ્રોજેક્ટના નામે આચરવામાં આવેલું 12.40 કરોડ રૂપિયાનું રિયલ એસ્ટેટ કૌભાંડ પ્રકાશમાં આવતા ચકચાર મચી ગયો છે. સમગ્ર મામલે કુલ 12 કરોડ 40 લાખ રૂપિયાની ઠગાઈ અંગે બોપલ પોલીસ સ્ટેશનમાં ફરિયાદ નોંધાઈ છે.બોપલ પોલીસે આ મામલે બિલ્ડર યોગેશ ઠક્કર, રોનક સોનાણી અને વિપુલ ગાંગાણીની ધરપકડ કરી છે, જ્યારે અન્ય ત્રણ ભાગીદારો હજુ ફરાર છે.
પ્રાપ્ત રિપોર્ટ મુજબ, અમદાવાદના બોપલ અને શેલામાં રિયલ એસ્ટેટના નામે કરોડો રૂપિયાનું કૌભાંડ સામે આવ્યું છે. ‘અક્ષર અનંત’ નામની સ્કીમ મૂકીને ગ્રાહકો પાસેથી બુકિંગના નામે કરોડો રૂપિયા ઉઘરાવી લેવામાં આવ્યા હતા.આ મામલે પોલીસ ફરિયાદ નોંધાતા તપાસનો ધમધમાટ શરૂ થયો હતો. પોલીસે આ કૌભાંડમાં સંડોવાયેલા ત્રણ મુખ્ય આરોપીઓ – યોગેશ ઠક્કર, રોનક સોનાણી, અને વિપુલ ગાંગાણીની ધરપકડ કરી છે. આ બિલ્ડરોએ ગ્રાહકોના નાણાંનો અંગત સ્વાર્થ માટે ઉપયોગ કર્યો હોવાનું પ્રાથમિક તપાસમાં જણાયું છે. જોકે, આ કેસમાં હજુ અન્ય ત્રણ આરોપીઓ ફરાર છે, જેમની શોધખોળ માટે પોલીસે ચક્રો ગતિમાન કર્યા છે.
મહત્વનું એ છે કે આરોપીઓ સામે અગાઉ પણ આર્થિક ગુના શાખા અમદાવાદ તેમજ બોડકદેવ અને સેટેલાઈટ પોલીસ સ્ટેશનમાં સમાન પ્રકારના ગુનાઓ નોંધાઈ ચૂક્યા છે. હાલ બોપલ પોલીસ સમગ્ર મામલે વધુ તપાસ કરી રહી છે અને અન્ય સંભવિત પીડિતો તથા આરોપીઓ અંગે માહિતી એકત્રિત કરવામાં આવી રહી છે.
તપાસ દરમિયાન એ પણ સામે આવ્યું છે કે આરોપીઓએ શેલા અને છારોડી વિસ્તારમાં વિવિધ સ્કીમો મૂકીને અનેક લોકોને રોકાણ માટે લલચાવ્યા હતા. લોકો પાસેથી મોટી રકમ મેળવી પછી પ્રોજેક્ટ બંધ કરી દેવાની પદ્ધતિથી ઠગાઈ કરવામાં આવી હોવાનો આરોપ છે.
આ ઘટનાએ અમદાવાદના રિયલ એસ્ટેટ માર્કેટમાં ભારે ચકચાર જગાવી છે. રોકાણકારો અને ઘર ખરીદનારાઓએ કોઈપણ નવી સ્કીમમાં રોકાણ કરતા પહેલા તે રેરા (RERA) હેઠળ રજીસ્ટર્ડ છે કે નહીં અને જમીનના ટાઈટલ ક્લિયર છે કે નહીં તેની ચોકસાઈપૂર્વક તપાસ કરવી જરૂરી બની છે.