અમદાવાદ : અમદાવાદમાં ફૂડ ડિલીવરીમાં ગંભીર બેદરકારીનો મામલો બહાર આવતા ખળભળાટ મચી ગયો છે. વસ્ત્રાપુરમાં આવેલી પ્રખ્યાત ફૂડ બ્રાન્ડ દમસફર યુનાઈટેડ ફૂડ બ્રાન્ડની એક હોટલ/રેસ્ટોરન્ટ દ્વારા ગ્રાહકને શાકાહારી ભોજનને બદલે માંસાહારી (નોનવેજ) વાનગી પીરસવામાં આવી હોવાનું બહાર આવ્યું છે. આ બેદરકારી ઉઘાડી પાડયા બાદ સબંધિત ગ્રાહકોમાં ભારે રોષનો માહોલ જોવા મળ્યો હતો. જેને લઈને હવે આ મામલે AMC તંત્ર પણ જાગ્યું છે. રેસ્ટોરન્ટની સામે દંડાત્મક કાર્યવાહી હાથ ધરી છે.
રિપોર્ટ મુજબ, રેસ્ટોરન્ટમાં ખાવા ગયેલી બે યુવતીઓ દ્વારા શાકાહારી વાનગીનો ઓર્ડર આપવામાં આવ્યો હતો, પરંતુ રેસ્ટોરન્ટની ગંભીર ભૂલના કારણે તેમને નોનવેજ વાનગી પીરસવામાં આવી હતી. આ બાબત ધ્યાને આવતા જ બંને યુવતીઓએ તાત્કાલિક ધોરણે આ મામલે મ્યુનિસિપલ કોર્પોરેશનના આરોગ્ય અને ફૂડ વિભાગમાં લેખિત તથા મૌખિક ફરિયાદ નોંધાવી હતી. યુવતીઓની આ જાગરૂકતાના કારણે વહીવટી તંત્ર તાત્કાલિક હરકતમાં આવ્યું હતું.આ ગંભીર બેદરકારીના કારણે ગ્રાહકોની ધાર્મિક આસ્થા અને આરોગ્ય બંને સાથે ગંભીર ચેડાં થયા છે.
ફરિયાદ મળતાની સાથે જ આરોગ્ય વિભાગની ટીમે સ્થળ તપાસ હાથ ધરી હતી અને રેસ્ટોરન્ટની રસોડાની તેમજ ખાદ્ય સામગ્રીની ગુણવત્તા ચકાસી હતી. ગ્રાહકોના આરોગ્ય અને શુદ્ધ શાકાહારી આહારના નિયમોનું ઉલ્લંઘન કરવા બદલ આરોગ્ય વિભાગે દમસફર બિરયાનીને સપાટામાં લઈને રૂપિયા 25,000 (રૂ. 25,000) નો માતબર દંડ ફટકાર્યો છે. આ કડક કાર્યવાહીથી અન્ય રેસ્ટોરન્ટ સંચાલકોમાં પણ ફફડાટ વ્યાપી ગયો છે અને ગ્રાહકો દ્વારા આવી બેદરકારી દાખવનાર સંચાલકો સામે વધુ કડક દંડાત્મક પગલાં ભરવાની માંગ કરવામાં આવી રહી છે.