અમદાવાદ : અમદાવાદના સીટીએમ એક્સપ્રેસ હાઈવે નજીક BRTS ટ્રેકમાં ગંભીર અકસ્માત સર્જાયો છે. BRTS ટ્રેકમાં મોપેડ ચાલકને બીઆરટીએસ બસ ચાલકે અડફેટે લેતા ગંભીર રીતે ઇજાગ્રસ્ત થયો છે. અકસ્માત એટલો ગંભીર હતો કે ટક્કર વાગતાની સાથે જ મોપેડ ચાલક 50 થી 60 ફૂટ જેટલો ઢસડાયો હતો.જેના કારણે મોપેડનું આગળનું ટાયર પણ ફંગોળાઈને નીકળી ગયું હતું.પોલીસ દ્વારા આ મામલે તપાસ શરૂ કરવામાં આવી છે.
પ્રાપ્ત રિપોર્ટ મુજબ, આ અકસ્માતમાં મોપેડ ચાલક યુવકે હેલ્મેટ પહેર્યું ન હોવાથી તેના માથાના ભાગે જીવલેણ ઈજાઓ પહોંચી છે. ઘટના બનતા જ અકસ્માતના કારણે મોપેડનો આગળનો ભાગ પણ નીકળી ગયો હતો અને આસપાસના લોકો ભેગા થઈ ગયા હતા. અને લોહીલુહાણ હાલતમાં પડેલા યુવકને જોઈ 108 એમ્બ્યુલન્સને જાણ કરી હતી. ઇજાગ્રસ્ત યુવકને સારવાર માટે નજીકની હોસ્પિટલમાં ખસેડવામાં આવ્યો છે, જ્યાં તેની હાલત અત્યંત નાજુક હોવાનું જાણવા મળી રહ્યું છે.
આ ઘટનાની જાણ થતા જ ટ્રાફિક પોલીસનો કાફલો સ્થળ પર પહોંચી ગયો હતો અને અકસ્માત અંગે તપાસ હાથ ધરી છે. ઉલ્લેખનીય છે કે,અમદાવાદમાં BRTS ટ્રેકમાં ખાનગી વાહનો ચલાવવા પર સખત મનાઈ હોવા છતાં, ટૂંકો રસ્તો કાપવાની લાલચમાં અનેક વાહનચાલકો જીવના જોખમે ટ્રેકમાં ઘૂસતા હોય છે. ટ્રેકમાં આ પ્રકારની બેદરકારીને કારણે અગાઉ પણ અનેક ગંભીર અકસ્માતો નોંધાયા છે.
શહેરમાં BRTS ટ્રેકમાં વાહન ચલાવવા પર પ્રતિબંધ છે છતાં પણ કેટલાક વાહનચાલકો પોતાના વાહન BRTS માં ચલાવતા હોય છે. જેના કારણે બસની સાથે અકસ્માતની ઘટના બનતી હોય છે. પૂર્વ વિસ્તારના BRTS માં અનેક વાહન ચાલકો આ પ્રકારે પોતાના વાહનો ચલાવતા હોય છે જેના કારણે થઈને આવી અકસ્માતની ગંભીર ઘટના બને છે.