અમદાવાદ: અમદાવાદ સિવિલ હોસ્પિટલ ખાતે પ્લાસ્ટિક સર્જરી વિભાગમાં આસિસ્ટન્ટ પ્રોફેસર તરીકે ફરજ બજાવતા ડોક્ટર સાયબર ક્રાઇમનો ભોગ બન્યા છે. ગઠિયાઓએ ડોક્ટરને ફોરેક્સ ટ્રેડિંગમાં રોકાણ કરી વધુ વળતર અપાવવાની લાલચ આપીને ટુકડે ટુકડે રૂપિયા 70 લાખ 65 હજારનું રોકાણ કરાવ્યું હતું. બાદમાં 1 લાખ 12 હજાર રૂપિયા પરત કરીને બાકીની રકમ 69.53 લાખ પરત ન કરીને છેતરપિંડી કરતાં સાયબર ક્રાઇમમાં પોલીસ ફરિયાદ નોંધાવવામાં આવી છે.
પ્રાપ્ત રિપોર્ટ મુજબ, મૂળ રાજસ્થાનના અને હાલ અમદાવાદ સિવિલમાં પ્લાસ્ટિક સર્જરી વિભાગમાં આસિસ્ટન્ટ પ્રોફેસર તરીકે ફરજ બજાવતા 39 વર્ષીય પિયુષ કૃષ્ણમુરારી માલવે સાયબર ક્રાઈમ પોલીસ સ્ટેશનમાં ફરિયાદ નોંધાવી છે. જૂન 2025માં ટેલિગ્રામ પર શેરબજારની એક જાહેરાત જોતી વખતે પિયુષભાઈનો સંપર્ક ‘સંજના’ નામની વ્યક્તિ સાથે થયો હતો. ટેલિગ્રામ એપ્લિકેશન મારફતે ફોરેક્સ ટ્રેડિંગ નામની ચેનલ મારફતે સંજના નામની અજાણી વ્યક્તિએ ટેલિગ્રામ મારફતે ફોરેક્સ ટ્રેડિંગમાં રોકાણ કરાવવા માટે એક વેબસાઇટની લિંક મોકલી હતી. જેમાં ફરિયાદીએ રજિસ્ટ્રેશન કરાવ્યું હતું. બાદમાં અલગ અલગ સમયે ફરિયાદી પાસે લાખો રૂપિયાનું રોકાણ કરાવ્યું હતું. જેના બદલામાં તેઓને નફો પણ વેબસાઇટમાં બતાવતા હતા.
પિયુષભાઈએ 27મી જૂન 2025થી 16મી જુલાઈ 2025 સુધીમાં રૂપિયા 17 લાખ 65 હજારનું રોકાણ કર્યું હતું, 17મી જુલાઈ 2025થી 1લી ઓગસ્ટ 2025 સુધીમાં 70 લાખ 65 હજારનું રોકાણ કર્યું હતું. જે રોકાણના બદલામાં તેઓને પ્રથમ 27,285 રૂપિયા નફો જ્યારે બીજા લાખ 85 હજાર નફો આપ્યો હતો. વેબસાઈટ પર તેમને 2,35,664 યુએસ ડૉલરનો નફો થયો હોવાનું આભાસી ચિત્ર બતાવવામાં આવતું હતું.બાદમાં આ સિવાય અન્ય કોઈ નફાની રકમ આપી ન હતી.
જ્યારે પિયુષભાઈએ પોતાનો નફો અને મુદલ રકમ ઉપાડવાનો પ્રયત્ન કર્યો, ત્યારે ઠગોએ ઈન્કમ ટેક્સ ભરવાના બહાને વધુ નાણાંની માંગણી કરી હતી. આ સમયે તેમને શંકા ગઈ અને તપાસ કરતા જાણવા મળ્યું કે જે ટેલિગ્રામ આઈડી (Darwinex Global CS) અને વેબસાઈટ દ્વારા તેઓ રોકાણ કરતા હતા તે બદલાઈ ગયા હતા. પોતાની સાથે છેતરપિંડી થઈ હોવાનું સમજાતા તેમણે સાયબર ક્રાઈમ પોલીસમાં વિધિવત ફરિયાદ નોંધાવી છે.