અમદાવાદ : અમદાવાદ શહેરમાં રીક્ષામાં બેસાડી લૂંટ કરતી ગેંગને વાડજ પોલીસની ટીમ દ્વારા ઝડપી લેવામાં આવી છે.રિક્ષામાં મુસાફરી કરતી મહિલાની નજર ચૂકવી તેના કાનમાંથી સોનાની કડીઓ ચોરી લેનાર રીક્ષા ગેંગના ત્રણ સાગરીતોને પોલીસે મુદ્દામાલ સાથે દબોચી લીધા છે.જેમણે શહેરના પોશ વિસ્તારોમાં આચરલા પાંચ જેટલા ગુનાઓની કબૂલાત કરી છે.
પ્રાપ્ત રિપોર્ટ મુજબ, વાડજ પોલીસ સ્ટેશનના પી.આઈ. વી.આર. ડાંગરના માર્ગદર્શન હેઠળ સર્વેલન્સ ટીમ પેટ્રોલિંગમાં હતી ત્યારે પોલીસે વાડજ પોલીસ સ્ટેશન વિસ્તારમાંથી લૂંટારૃ ગેંગને પોલીસે બાતમીના આધારે ઝડપી પાડી છે. પકડાયેલ આરોપીઓમાં વિનોદ ઉર્ફે ગોગો ભેમાભાઈ પરમાર (રહે. એરપોર્ટ પાસે, અમદાવાદ), વિનોદ ઉર્ફે મેન્ડી કેશાભાઈ બાવરી (રહે. એરપોર્ટ પાસે, અમદાવાદ), વિજય કાનજીભાઈ બાવરી (રહે. એરપોર્ટ પાસે, અમદાવાદ)નો સમાવેશ થાય છે. આ ગેંગ મુસાફરોને રિક્ષામાં બેસાડી તેમની નજર ચૂકવી ચોરી અને લૂંટ ચલાવતી હતી.
વાડજ પોલીસની પૂછપરછમાં જાણવા મળ્યું છે કે, પકડાયેલા આરોપીઓ પૈકી વિનોદ ઉર્ફે ગોગો વિરુદ્ધ અગાઉ સાબરમતી, સરદારનગર અને ઓઢવ પોલીસ સ્ટેશનમાં છેતરપિંડી અને ચોરીના ગુના નોંધાયેલા છે. જ્યારે વિજય બાવરી વિરુદ્ધ એરપોર્ટ અને સરદારનગર પોલીસ સ્ટેશનમાં હત્યાની કોશિશ (307) અને છેડતી જેવા અનેક ગંભીર ગુનાઓ નોંધાયેલા હોવાનું સામે આવ્યું છે.
વાડજ પોલીસે આરોપીઓ પાસેથી કુલ ₹75,000/- નો મુદ્દામાલ રિકવર કર્યો છે, જેમાં:3.160 ગ્રામ વજનની સોનાની બે કડીઓ (કિંમત ₹35,000/-) ગુનામાં વપરાયેલી ઓટોરીક્ષા (કિંમત ₹40,000/-) આ સફળ કામગીરીમાં પી.એસ.આઈ. જી.આર. આલ તથા વાડજ પોલીસના હેડ કોન્સ્ટેબલ ડાહ્યાભાઈ, દેવકરણભાઈ અને કોન્સ્ટેબલ રણજીતસિંહ, બળવંતભાઈ, દિપકુમાર તથા કેતનભાઈ જોડાયા હતા.