અમદાવાદ : અમદાવાદ મહાનગરપાલિકાના 48 વોર્ડની મતગણતરીમાં ભાજપે ધમાકેદાર શરૂઆત કરી છે. ચૂંટણીના પરિણામોમાં ભારતીય જનતા પાર્ટીએ ભવ્ય પ્રદર્શન કરીને સત્તા જાળવી રાખી છે. શહેરની કુલ 192 બેઠકો પૈકી ભાજપે 101 બેઠકો પર વિજય મેળવીને સ્પષ્ટ બહુમતી હાંસલ કરી છે.જનતાએ વિકાસના એજન્ડાને સમર્થન આપીને ફરી એકવાર કેસરીયો લહેરાવ્યો છે.
રિપોર્ટ મુજબ, શહેરના મોટાભાગના વિસ્તારોમાં ભાજપની પેનલનો દબદબો જોવા મળ્યો છે. અમદાવાદમાં પશ્ચિમ વિસ્તારના જોધપુર, ગોતા, નવરંગપુરા, નવા વાડજ, નારણપુરા, અસારવા, ભાજપની આખેઆખી પેનલ વિજેતા જાહેર થઈ છે. આ જીત સાથે ભાજપે 101 બેઠકો પર વિજય મેળવીને સ્પષ્ટ બહુમતી હાંસલ કરી છે અને પણ મતદારોએ વિકાસના કામો પર મહોર લગાવી છે. કાર્યકરોમાં ભારે ઉત્સાહ જોવા મળી રહ્યો છે.
અમદાવાદમાં ચાંદખેડામાં ભાજપની પેનલનો ભવ્ય વિજય થયો છે. કોંગ્રેસના વર્તમાન કોર્પોરેટર રાજશ્રી કેસરીનો પરાજય થયો છે. તેઓ છેલ્લા બે ટર્મથી રાજશ્રી કેસરી કોર્પોરેટર હતા. બાપુનગરમાં ભાજપની પેનલ તૂટી છે, આ વર્ષે ત્રણ ભાજપ અને એક કોંગ્રેસની જીત થઇ છે. કોંગ્રેસના નાગજી દેસાઈની જીત થઇ છે. બાપુનગરમાં ભાજપની લહેર હોવા છતાં કોંગ્રેસના ઉમેદવારે મતદારોનો વિશ્વાસ મેળવ્યો છે.
શહેરના અમુક વિસ્તારોમાં કોંગ્રેસે પોતાનું વર્ચસ્વ જાળવવામાં સફળતા મેળવી છે. દરિયાપુર વોર્ડમાં કોંગ્રેસની આખી પેનલ વિજયી બની છે. વિજેતા ઉમેદવારોમાં મોનાબેન પ્રજાપતિ, સમીર મોહમ્મદ શેખ, ઈમ્તિયાઝ શેખ અને નીરવ બક્ષીનો સમાવેશ થાય છે. બહેરામપુરા વોર્ડમાં પણ કોંગ્રેસની પેનલે જીત મેળવીને પોતાનો ગઢ જાળવી રાખ્યો છે. ભાજપની લહેર હોવા છતાં આ વિસ્તારોમાં કોંગ્રેસના ઉમેદવારોએ મતદારોનો વિશ્વાસ મેળવ્યો છે.
અમદાવાદ મ્યુ કોર્પોરેશન ઉપરાંત અમદાવાદ જિલ્લાની નગરપાલિકાઓમાં પણ ભાજપનો વિજયી લહેર જોવા મળી છે. ધોળકા નગરપાલિકા અહીંના વોર્ડ નંબર 1 માં ભાજપની આખેઆખી પેનલનો ભવ્ય વિજય થયો છે. વિરમગામમાં પણ ભાજપે મક્કમ પકડ જાળવી રાખી છે. અહીં પણ વોર્ડ નંબર 1 માં ભાજપની પેનલ વિજેતા જાહેર થઈ છે.
ગુજરાતના શહેરી વિસ્તારો ભાજપના ગઢ સમાન રહ્યા છે. અમદાવાદ અને રાજકોટ મહાનગરપાલિકામાં છેલ્લા 20 વર્ષથી અને સુરત, વડોદરા, જામનગર અને ભાવનગરમાં છેલ્લા 30 વર્ષથી ભાજપનું એકહથ્થું શાસન છે. અનેક રાજકીય ઉતાર ચડાવ વચ્ચે પણ શહેરી વિસ્તારોમાં ભાજપે પકડ બનાવી રાખવામાં સફળ રહ્યો છે.