અમદાવાદ : અમદાવાદના બોપલ-શીલજ વિસ્તારમાં બનેલી કાળજું કંપાવનારી અકસ્માતની ઘટનામાં બોપલ પોલીસને મોટી સફળતા હાથ લાગી છે. નવપરિણીત મહિલા નિશીનું મોત નીપજાવનાર મુખ્ય આરોપી સુનિલ પરમારની પોલીસે રાજસ્થાનના ડુંગરપુરથી ધરપકડ કરી લીધી છે. અકસ્માત સર્જીને સોલા સિવિલ હોસ્પિટલમાંથી નાસી છૂટેલો આરોપી રાજસ્થાન ભાગી ગયો હતો, જેને પોલીસે સઘન તપાસના અંતે દબોચી લીધો છે.
રિપોર્ટ મુજબ, ગત 12 સપ્ટેમ્બરે પલ્સર ચાલકે ગોળીની સ્પીડે એક્સેસને ઉડાવતા પતિની નજર સામે જ પત્નીનું મોત થયું હતું. જેના ભયાનક CCTV સામે આવ્યા હતા. ગરબા ક્લાસ બાદ ગણેશોત્સવનો સામાન લઈને પત્ની એક્સેસ પર અને પતિ બાઈક પર રાત્રે ઘરે જતા હતા. આ દરમિયાન શીલજ કેનાલ રોડ પર ટર્ન લેતી વખતે બેફામ સ્પીડમાં બાઈક ચાલકે ટક્કર મારી હતી. ત્યાર બાદ આરોપી બાઇક મૂકીને ફરાર થઈ ગયો હતો.
તપાસમાં બહાર આવ્યું કે આરોપીનું બાઈક રાજસ્થાન પાસિંગનું હતું અને તે ઘરઘાટી તરીકે કામ કરતો હતો. અકસ્માતના 48 કલાક પછી પણ આરોપી ન પકડાતા પતિ હાર્દિકે રડતા રડતા વીડિયો બનાવીને સોશિયલ મીડિયા પર ન્યાયની માગ કરી હતી. તેમણે મુખ્યમંત્રી, હર્ષ સંઘવી અને પોલીસ તંત્રને અપીલ કરી હતી કે બેફામ ડ્રાઈવિંગ કરનારા સામે કડક કાર્યવાહી કરવામાં આવે.
પતિની આ માર્મિક અપીલ અને સીસીટીવી ફૂટેજના આધારે પોલીસે ત્વરિત કાર્યવાહી હાથ ધરી હતી. આરોપી સોલા સિવિલમાં સારવાર લીધા બાદ ભાગીને રાજસ્થાન પહોંચ્યો હોવાની બાતમી મળતાં જ બોપલ પોલીસે ત્યાં દરોડો પાડીને સુનિલ પરમારની ધરપકડ કરી લીધી છે. આ ઘટનાને પગલે સમગ્ર વિસ્તારમાં અરેરાટી વ્યાપી ગઈ છે અને હવે પોલીસ આરોપી સામે કડક કાનૂની કાર્યવાહી કરી રહી છે.