અમદાવાદ : દિવાળીના તહેવારોમાં વતન જવા માગતા મુસાફરોની સુવિધા માટે અમદાવાદ ST વિભાગ દ્વારા દિવાળી સ્પેશિયલ એકસ્ટ્રા બસોનું આયોજન કરવામાં આવ્યું છે. મુસાફરોના વધતા ઘસારાને ધ્યાનમાં રાખીને 2 થી 8 નવેમ્બર દરમિયાન કુલ 1,150 વધારાની બસ ટ્રીપોનું સંચાલન કરવામાં આવશે. ખાસ કરીને અમદાવાદથી રાજ્યના ચારેય ઝોન તરફ વધારાની બસો દોડાવવાનો પ્રશંસનીય નિર્ણય લેવામાં આવ્યો છે.
ST વિભાગના જણાવ્યા અનુસાર, નિગમ દ્વારા આ વર્ષે તહેવારોના દિવસોમાં 300 થી 350 જેટલી વધારાની બસો મારફતે 1,150 જેટલી એક્સ્ટ્રા ટ્રીપનું સંચાલન કરવામાં આવશે. આ ખાસ ઓપરેશન તારીખ 2 થી 8 સુધી કાર્યરત રહેશે. વિશેષ કરીને સૌરાષ્ટ્રના અમરેલી, ભાવનગર, રાજકોટ, જૂનાગઢ જેવા વિસ્તારો તેમજ ઉત્તર ગુજરાત અને પંચમહાલ-દાહોદ તરફ જતા મુસાફરો માટે વધારાના રૂટ શરૂ કરાયા છે. આ ઉપરાંત, રાજસ્થાન તરફ રહેતા અને તહેવાર મનાવવા જતા લોકો માટે પણ એકસ્ટ્રા બસનું આયોજન કરાયું છે.
મુસાફરોની ભીડને સુવ્યવસ્થિત રીતે નિયંત્રિત કરવા માટે આ વર્ષે ગીતામંદિર અને કૃષ્ણનગર ઉપરાંત ઈસ્કોન, CTM અને અડાલજ જેવા 3 નવા બસ સ્ટોપેજ પરથી પણ એકસ્ટ્રા બસોનું સંચાલન થશે. આ નવા સ્થળો પર મુસાફરોની સહાયતા માટે વિશેષ સુપરવાઈઝર પણ મૂકવામાં આવશે. હાલમાં જ સૌરાષ્ટ્ર તરફ જતી બસોમાં 50 ટકા જેટલું એડવાન્સ અને ગૃપ બુકિંગ થઈ ચૂક્યું છે, જે દર્શાવે છે કે આ આયોજનથી લોકોને મોટો રાહત મળશે.
ડિજિટલ ઈન્ડિયાને પ્રોત્સાહન આપવા અને મુસાફરી વધુ સરળ બનાવવા માટે બસમાં કેશલેસ સુવિધા ઉપલબ્ધ કરાવાઈ છે. બસમાં કંડક્ટરને QR સ્કેનર મશીન આપવામાં આવશે, જેથી પેસેન્જર અને કંડક્ટર વચ્ચે છૂટા પૈસાને લઈને કોઈ રકઝક કે વિવાદ ન થાય. મુસાફરો ઓનલાઈન રિઝર્વેશન, મોબાઈલ એપ તેમજ બસમાં જઈને પણ ડિજિટલ પેમેન્ટથી ટિકિટ મેળવી શકશે.
તદુપરાંત, ભાઈબીજથી લઈને દિવાળી વેકેશન પૂર્ણ ન થાય ત્યાં સુધી દર્શનાર્થીઓ માટે વિવિધ ધાર્મિક સ્થળો પર પણ વિશેષ બસોનું સંચાલન ચાલુ રાખવામાં આવશે, જેથી શ્રદ્ધાળુઓ સુગમતાથી દર્શન કરી શકે.
તહેવારો દરમિયાન મુસાફરોને પરિવહનની મુશ્કેલી ન પડે તે માટે ST વિભાગે વધારાની બસ ટ્રીપોનું આયોજન કર્યું છે. મુસાફરોને મુસાફરી પહેલાં ટિકિટનું એડવાન્સ બુકિંગ કરાવી લેવા અને બસના સમય તથા પ્રસ્થાન સ્થળની વિગતો તપાસી લેવા સલાહ આપવામાં આવે છે.