અમદાવાદ : દિવાળીના તહેવારો દરમિયાન કરોડો રૂપિયાની રોકડ અને કિંમતી સોના-ચાંદીના દાગીનાની મોટાપાયે હેરાફેરી થતી હોય છે.આ તહેવારોના માહોલમાં પરપ્રાંતીય ચીટર અને લૂંટારુ ગેંગ સક્રિય થઈને વેપારીઓને નિશાન ન બનાવે તે માટે અમદાવાદ શહેર પોલીસ દ્વારા આંગડિયા પેઢીઓ,કુરિયર સર્વિસ અને જ્વેલર્સ માટે અત્યંત મહત્વપૂર્ણ સુરક્ષા માર્ગદર્શિકા જારી કરવામાં આવી છે.
રિપોર્ટ મુજબ, દિવાળીના તહેવારોમાં આંગડિયા પેઢીના કર્મચારીઓ મોટી રોકડ રકમ લઈને અવરજવર કરતા હોવાથી કાયદો અને વ્યવસ્થા જાળવવા અમદાવાદ શહેર પોલીસે ખાસ ઝુંબેશ હાથ ધરી છે. જેના અંતર્ગત શહેર પોલીસે આંગડિયા બજારો અને સંવેદનશીલ વેપારી વિસ્તારોમાં ખાસ તકેદારી દર્શાવતા પોસ્ટર્સ લગાવીને કડક સુરક્ષા પગલાં તરફી અમલમાં મુકવા નિર્દેશ આપ્યો છે.
પોલીસના જણાવ્યા અનુસાર, તહેવારોમાં લૂંટ ચલાવતા ઇસમો મોટાભાગે બહારના રાજ્યના હોય છે અને તેઓ મહિલા સાગરીતની મદદથી દુકાનો આગળ રેકી પણ કરાવતા હોય છે. આથી વેપારીઓ અને કર્મચારીઓએ સતર્કતા રાખવી અનિવાર્ય છે.
કિંમતી સામાનવાળી બેગ તેમજ વાહનોમાં જીપીએસ ડીવાઇસ સંપૂર્ણ ચાલુ રાખવાં. દુકાનની અંદર તેમજ બહાર માર્ગ સ્પષ્ટ દેખાય તે રીતે સીસીટીવી કેમેરા લગાવવા અને સ્ટોરેજ-એલાર્મ નિયમિત ચેક કરવાં. કર્મચારીઓએ બોડીવોર્ન અથવા બટન કેમેરાનો ઉપયોગ કરવો.
કટોકટીના સમયે તુરંત ઉપયોગ કરી શકાય તે માટે કર્મચારીઓના મોબાઇલમાં પેનિક બટન હોવું જોઈએ. કોઈ વ્યક્તિ પીછો કરતી જણાય તો તુરંત જ 112 નંબર પર જાણ કરવી.
કર્મચારીઓએ રોકડ કે કિંમતી માલની હેરફેર વખતે એક જ રૂટ પર વારંવાર ન ફરવું અને શક્ય હોય ત્યાં સુધી મુખ્ય માર્ગોનો જ ઉપયોગ કરવો. કર્મચારીઓએ એકલદોકલ જવાનું ટાળવું તેમજ ગ્રુપમાં જ નીકળવું.
તમામ સ્ટાફ અને ઘરઘાટીનું ટેનન્ટ/લેબર વેરિફિકેશન કરાવવું. કર્મચારી રજા પર જાય ત્યારે પણ તેના પર નજર રાખવી. કોઈ કર્મચારી સોનું કે રોકડ લઈને ભાગવાનો પ્રયાસ કરે તો તુરંત પ્રતિકાર કરવો.
સોનું લઈ જતી વખતે સલામત ટૂ-વ્હીલર અથવા ફોર-વ્હીલર મોકલવું તથા માલ લઈ જનાર કર્મચારીની સંપૂર્ણ વિગત નોંધવી. કિંમતી માલ અને કર્મચારીઓનો પૂરતો ઇન્સ્યોરન્સ હોવો જરૂરી છે.
બજાર અને પેઢીના એન્ટ્રી-એક્ઝિટ પોઇન્ટ પર સશસ્ત્ર સિક્યુરિટી ગાર્ડ એલર્ટ રાખવા અને રાત્રે એજન્સીના માલિકે આ જગ્યાનું સરપ્રાઇઝ ચેકિંગ કરવું. સમગ્ર તહેવારો દરમિયાન આંગડિયા પેઢીઓએ સ્થાનિક પોલીસ સાથે સતત સંકલન જાળવવું.