અમદાવાદ : અમદાવાદમાં મેટ્રો સ્ટેશન સુધી પહોંચવા માટે પોતાના વાહનનો ઉપયોગ કરતા મુસાફરોને હવે પાર્કિંગની સમસ્યામાંથી રાહત મળવાની શક્યતા છે. મેટ્રો સ્ટેશન પાસે પાર્કિંગની વ્યવસ્થા મ્યુનિસિપલ કોર્પોરેશન દ્વારા હવે ગોઠવવામાં આવી છે. પૂર્વ અને પશ્ચિમ વિસ્તારના મેટ્રો સ્ટેશન આસપાસ 9 પ્લોટ પાર્કિંગ માટે ફાળવવામાં આવ્યા છે. આ પ્લોટમાં કુલ 5,903 ટુ-વ્હીલર અને 246 ફોર-વ્હીલર માટે પાર્કિંગની સુવિધા ઊભી કરવામાં આવશે.
રિપોર્ટ મુજબ, અમદાવાદ મ્યુનિસિપલ કોર્પોરેશન દ્વારા શોધાયેલા આ 9 પ્લોટ કુલ 36,890 ચોરસ મીટરના વિશાળ ક્ષેત્રફળમાં પથરાયેલા છે. 3 મુખ્ય ઝોન હેઠળ આવરી લેવાયેલા આ પ્લોટ્સમાં કુલ 5,903 ટુ-વ્હીલર અને 246 ફોર-વ્હીલર એકસાથે સરળતાથી પાર્ક થઈ શકે એવી ક્ષમતા ઊભી કરવામાં આવશે. આ વ્યવસ્થા અમલી બનવાથી મેટ્રો સ્ટેશન આસપાસ રોડ પર થતું આડેધડ પાર્કિંગ અટકશે અને ટ્રાફિકની સમસ્યામાંથી પણ મુક્તિ મળશે. આગામી બે મહિનામાં, એટલે કે દિવાળી પહેલાં પાર્કિંગ શરૂ કરી દેવાની શક્યતા છે.
કોર્પોરેશન દ્વારા શહેરના પૂર્વ વિસ્તારમાં વસ્ત્રાલ અને એપરલ પાર્ક તેમજ પશ્ચિમ વિસ્તારમાં થલતેજ, વાડજ અને સાબરમતી સહિતના મુખ્ય મેટ્રો સ્ટેશનો નજીક આ પ્લોટ્સની પસંદગી કરવામાં આવી છે. આગામી દિવસોમાં મ્યુનિસિપલ કોર્પોરેશન દ્વારા વાહન પાર્કિંગના વ્યાજબી દરો નક્કી કરી દરખાસ્તને મંજૂરી આપવામાં આવશે, ત્યારબાદ આ તમામ પે એન્ડ પાર્ક પ્લોટ નાગરિકો માટે વિધિવત ખુલ્લા મુકાશે.