અમદાવાદ : મહારાષ્ટ્રમાં હાલમાં જો કોઈ IAS અધિકારી સૌથી વધુ ચર્ચામાં હોય તો તે તુકારામ મુંઢે છે. મહારાષ્ટ્રના ફૂડ એન્ડ ડ્રગ્સ કમિશનર (FDA) અને બેબાક મિજાજ માટે જાણીતા અધિકારી તુકારામ મુંઢે ગાંધીનગર ખાતે એક કૉલેજના વિદ્યાર્થીઓ સાથે સંવાદ કરવા આવ્યા હતા. અહેવાલો અનુસાર અહીં તેમણે લોકોને સલાહ આપી હતી કે તમે પેટમાં શું નાખો છો, શું ખાઓ છો તે જાણો.
રિપોર્ટ મુજબ, મહારાષ્ટ્ર FDA કમિશનર’ અને ‘તુકારામ સે ટક્કર’ થીમ હેઠળ યોજાયેલા આ સેશનમાં મુંઢેએ સ્પષ્ટ શબ્દોમાં જણાવ્યું હતું કે, દેશમાં ફૂડ સેફ્ટીના પૂરતા નિયમો અને કાયદાઓ હોવા છતાં તેનું યોગ્ય પાલન કરાવવું હજુ પણ એક મોટો વહીવટી પડકાર છે. લાયસન્સિંગ અને રજિસ્ટ્રેશન સિવાયના અનેક નિયમોનું પાલન થતું ન હોવાથી નાગરિકોના સ્વાસ્થ્ય પર સીધી અસર થઈ રહી છે.
તેમણે બાળકોમાં વધતી સ્થૂળતા મામલે ચિંતા વ્યક્ત કરતા જણાવ્યું હતું કે બાળકોની ફૂડ હેબિટમાં સુધારો લાવવાની શરૂઆત પરિવારથી જ થવી જોઈએ. આ સાથે તેમણે ઉમેર્યું હતું કે સ્કૂલની આસપાસ ફાસ્ટ ફૂડનું વેચાણ ન થવું જોઈએ. મહારાષ્ટ્રમાં સ્કૂલથી 50 મીટર સુધી જંક ફૂડના વેચાણ, જાહેરાત અને બનાવટ પર પ્રતિબંધ છે
અત્રે ઉલ્લેખનીય છે કે ગુજરાતમાં પણ એનાલોગ પનીર, બટર, ચીઝ પર પ્રતિબંધ લગાવવામાં આવ્યો છે. રાજ્યમાં મનપા અને રાજ્ય સરકાર સતત ખાદ્ય પદાર્થોની ચકાસણી કરવા રેડ પાડતા રહે છે. બીજી બાજુ મહારાષ્ટ્રમાં તુકારામ મુંઢેએ ફૂડ સેફ્ટી માટે સખત કડક અભિગમ અપનાવતા તેઓ સતત ચર્ચામાં રહે છે અને સોશિયલ મીડિયા પર લોકો તેમની પ્રસંશા કરે છે.
તમને જણાવી દઈએ કે ગત મે 2026માં ફૂડ ઍન્ડ ડ્રગ એડમિનિસ્ટ્રેશન(FDA)ના કમિશનર તરીકેનો પદભાર સંભાળ્યા બાદ તેમણે રાજ્યભરમાં ભેળસેળ કરનારાઓ સામે લાલ આંખ કરી છે. માત્ર ત્રણ મહિનાના ટૂંકા ગાળામાં 1,100થી વધુ દરોડા, 165 લાયસન્સ સસ્પેન્ડ, રૂ. 50થી 55 કરોડની કિંમતનો અસુરક્ષિત ખાદ્યપદાર્થ જપ્ત, એનાલોગ પનીર પર એક વર્ષનો પ્રતિબંધ અને હવે પાન મસાલાની જાહેરાત મામલે બોલિવૂડ કલાકારોને નોટિસ ફટકારીને તેઓ ફરી એકવાર ચર્ચામાં આવ્યા છે.