અમદાવાદ : અમદાવાદના થલતેજ વિસ્તારમાં આવેલા એઈસી ગ્રાઉન્ડ ખાતે દશેરાની ઉજવણીના ભાગરૂપે 50 થી 51 ફૂટ ઊંચા રાવણનું દહન કરવામાં આવ્યું.જ્યારે મેઘનાથ અને કુંભકર્ણના 35 ફૂટ ઊંચા પૂતળાનું પણ દહન કરાયું.રાવણ દહનની સાથે આતશબાજી અને વિવિધ કાર્યક્રમોનું પણ આયોજન કરાયું હતુ. જેમાં મુખ્યમંત્રી ભૂપેન્દ્ર પટેલ મુખ્યમ મહેમાન બન્યાં હતા. શહેરના મેયર હિતેશ બારોટ સહિત મોટા ભાગના ભાજપના નેતાઓએ કાર્યક્રમમાં હાજરી આપી હતી.
રિપોર્ટ મુજબ, અમદાવાદ શહેરમાં થલતેજ વિસ્તારમાં દુરદર્શન ટાવર પાસે આવેલા એઈસી ગ્રાઉન્ડ ખાતે રાવણ દહનના ભવ્ય કાર્યક્રમનું આયોજન કરવામાં આવ્યું હતું. આ કાર્યક્રમમાં ૫૨ ફૂટ ઊંચા રાવણના પૂતળું તૈયાર કરવામાં આવ્યું હતું. રાવણની સાથે સાથે 35 થી 40 ફૂટ ઊંચા મેઘનાથ અને કુંભકર્ણના પૂતળાઓનું પણ મુખ્ય પ્રધાન ભૂપેન્દ્ર પટેલના હસ્તે દહન કરવામાં આવ્યું હતું. તેમણે આધુનિક તકનીકથી રિમોટનું બટન દબાવીને મેઘનાદ, કુંભકર્ણ અને રાવણના મહાકાય પૂતળાનું દહન કર્યું હતું.
અમદાવાદમાં પહેલી વખત આટલા મોટા રાવણના પૂતળાનું દહન કરવામાં આવ્યું હતું. લગભગ એક અઠવાડિયાથી રાવણ દહનના કાર્યક્રમ અંગેની તૈયારીઓ કરવામાં આવી રહી હતી. આ માટે શહેરના તમામ ધારાસભ્યો અને નેતાઓ તેમજ નાગરિકો ઉપસ્થિત રહ્યા હતા. શાંતિ સેવા ચેરીટેબલ ટ્રસ્ટ દ્વારા અમદાવાદના તમામ નાગરિકોને રાવણ દહનના કાર્યક્રમમાં ઉપસ્થિત રહેવા માટે આમંત્રણ આપવામાં આવ્યું હતું.
રાવણ દહન ઉપરાંત શાંતિ સેવા ચેરીટેબલ ટ્રસ્ટ દ્વારા વિજયાદશમી મહોત્સવ-2026 અંતર્ગત અમદાવાદમાં ડાયરો અને રાવણદહનના કાર્યક્રમ યોજાયો હતો. સાંઇરામ દવેની ટીમ દ્વારા ડાયરો પ્રસ્તુત કરાયો હતો.વિશાળ આયોજનમાં મોટી સંખ્યામાં લોકો પણ આ કાર્યક્રમમાં જોડાયા હતા.
આ ઉપરાંત અમદાવાદના ભાડજના હરે કૃષ્ણ મંદિર, ગાંધીનગર ખાતે ભવ્ય રાવણદહન અને રામલીલા કાર્યક્રમમાં મોટી સંખ્યામાં માનવ મહેરામણ ઉમટ્યું હતું અને મહેમદાવાદના સિદ્ધિ વિનાયક મંદિરે 61 ફૂટ ઊંચાં રાવણનાં પૂતળાનું દહન કરવામાં આવ્યું હતું.