અમદાવાદ : ગુજરાત સરકારના શિક્ષણ વિભાગે શાળાઓમાં વિદ્યાર્થીઓની સુરક્ષા, ગોપનીયતા અને સલામતીને ધ્યાનમાં રાખીને શાળા પરિસરમાં બિનઅધિકૃત વ્યક્તિઓની અવરજવર પર પ્રતિબંધ મૂકવા અંગે પરિપત્ર જાહેર કર્યો છે. પરિપત્રમાં શાળા પરિસરમાં પ્રવેશ, મુલાકાતીઓની નોંધણી તેમજ વિદ્યાર્થીઓના ફોટો-વીડિયો ઉતારવા અને પ્રસારિત કરવા અંગે પણ સ્પષ્ટ સૂચનાઓ આપવામાં આવી છે.
રિપોર્ટ મુજબ, 21 ઓક્ટોબર, 2026ના રોજ જાહેર થયેલા પરિપત્ર મુજબ, હવેથી કોઈપણ બિનઅધિકૃત વ્યક્તિ કે બહારના વ્યક્તિએ સરકારી શાળાની મુલાકાત લેવા માટે અગાઉથી લેખિત મંજૂરી મેળવવી પડશે. આ ઉપરાંત, શાળા પરિસરમાં આવતા દરેક મુલાકાતીઓની નોંધ રાખવા માટે તમામ શાળાઓમાં ‘વિઝિટર રજિસ્ટર’ રાખવું ફરજિયાત કરવામાં આવ્યું છે. જેથી શાળામાં કોણ આવે છે અને કોને મળે છે તેની સંપૂર્ણ પારદર્શિતા જળવાઈ રહેશે.
આ પરિપત્ર મુજબ શાળાના પરિસરમાં પરવાનગી વિના ફોટા પાડવા કે વિડિયો રેકોર્ડ કરવા પર પ્રતિબંધ છે. તેમજ જે વ્યક્તિઓ આ નિયમોનું ઉલ્લંઘન કરીને શાળામાં પ્રવેશ કરશે અથવા અધિકૃત પરવાનગી વિના ફોટોગ્રાફી કે વિડિયોગ્રાફી કરશે તેમની વિરુદ્ધ કાયદેસરની કાર્યવાહી કરવામાં આવશે. રાજ્ય સરકારના આ નવા નિયમોના અમલીકરણથી શાળાઓમાં બિનજરૂરી દખલગીરી અટકશે અને શૈક્ષણિક કાર્ય સુચારૂરૂપે ચાલી શકશે.