અમદાવાદ : અમદાવાદમાં ગેરકાયદે પ્રવૃત્તિઓ અને બાંધકામ દરમિયાન હવાના પ્રદૂષણને અટકાવવા અમદાવાદ મ્યુનિસિપલ કોર્પોરેશનના એસ્ટેટ વિભાગે કાર્યવાહી હાથ ધરી છે. ચાંદલોડિયામાં પરવાનગી વિના ગેસ ગોડાઉન તરીકે ઉપયોગમાં લેવાતી જગ્યા સીલ કરવામાં આવી છે. બીજી તરફ, ગ્રીન નેટ લગાવવાની સૂચનાનું પાલન ન કરતી ગોતા અને થલતેજ વિસ્તારની 11 બાંધકામ સાઇટને પણ સીલ કરવામાં આવી છે.
રિપોર્ટ મુજબ, શહેરના પશ્ચિમ વિસ્તારમાં ગોતા અને થલતેજના વિસ્તારોમાં ચાલતી ઓન ગોઇંગ કન્સ્ટ્રકશન સાઈટો ઉપર કોર્પોરેશનના એસ્ટેટ વિભાગ દ્વારા કાર્યવાહી કરવામાં આવી છે. હવા પ્રદુષણ ન ફેલાય તેના માટે ઓન ગોઇંગ કન્સ્ટ્રક્શન સાઇટ પર ગ્રીન નેટ લગાવવા માટેની સૂચના એસ્ટેટ વિભાગ દ્વારા આપવામાં આવી હોવા છતાં પણ કાર્યવાહી ન કરવામાં આવતા 11 જેટલી કન્સ્ટ્રક્શન સાઇટને સીલ કરવામાં આવી છે.
આ ઉપરાંત ‘અતિથિ ગોકુળ’ નામની કન્સ્ટ્રક્શન સાઇટ સામે પણ ગ્રીન નેટના મુદ્દે કાર્યવાહી કરવામાં આવી હતી. જોકે, આ સાઇટને સીલ કરવાને બદલે રૂ.25,000નો દંડ ફટકારવામાં આવ્યો હતો.
ચાંદલોડિયાના ચામુંડા નગરમાં આવેલી ‘સુવિધા ગેસ સર્વિસ’ની જગ્યાનો જરૂરી પરવાનગી વિના ગેસ ગોડાઉન તરીકે ઉપયોગ થતો હોવાની વિગતો સામે આવી હતી. આ મામલે AMCના ઉત્તર પશ્ચિમ ઝોનના એસ્ટેટ વિભાગે અગાઉ નોટિસ આપી હતી. જોકે, નોટિસ બાદ પણ જગ્યાનો ગોડાઉન તરીકે ઉપયોગ ચાલુ રહેતાં અધિકારીઓએ સ્થળ પર પહોંચીને તેને સીલ કરી દીધું હતું.
શહેરમાં પશ્ચિમ અને દક્ષિણ પશ્ચિમ ઝોનમાં પણ અનેક જગ્યાએ બાંધકામની કામગીરી ચાલી રહી છે. આવા સ્થળોએ પણ પ્રદૂષણ નિયંત્રણના નિયમોનું પાલન કરાવવું જરૂરી છે. ત્યારે ઉત્તર પશ્ચિમ ઝોનની જેમ અન્ય ઝોનમાં પણ આવી કાર્યવાહી થઈ રહી છે કે નહીં, તે અંગે સવાલ ઊભા થયા છે.