અમદાવાદ : અમદાવાદમાં બેફામ દોડતી BRTS બસે વધુ એક વ્યકિતનો ભોગ લીધો છે. CTM વિસ્તારમાં BRTS બસે બાઈકચાલકને અડફેડે લેતા ચાલકનું ઘટના સ્થળે જ મોત નિપજ્યું છે. બીજી બાજુ આ બનાવની જાણ થતા જ પોલીસનો કાફલો ઘટના સ્થળે પહોંચીને આગળની કાર્યવાહી હાથ ધરી હતી. અકસ્માતના પગલે ટ્રાફિકજામ થઈ ગયો હતો.
પ્રાપ્ત માહિતી પ્રમાણે અમદાવાદમાં આવેલા CTM વિસ્તાર નજીક અકસ્માતનો બનાવ સામે આવ્યો છે. CTM નજીક આવેલા ભારતી ટાવર નજીક BRTSની બસે એક બાઈકચાલકને અડફેટે લીધો હતો. જેમાં BRTS ચાલકે બસની આગળની સાઈડની બાઈક સવારને ટક્કર મારી હતી. અચાનક પાછળથી ટક્કર વાગતા બાઈક સવારે પોતાનું બેલેન્સ ગુમાવ્યુ હતુ, અને તે નીચે પટકાયો હતો. બનાવને પગલે ઘટના સ્થળે લોકો દોડીને આવ્યા હતા અને 108ને જાણ કરી હતી, જો કે, બાઈક સવારનું ઘટના સ્થળે જ મોત થઈ ગયુ હતુ.
અકસ્માતને પગલે ભારતી ટાવર વિસ્તારમાં ટ્રાફિક જામની પરિસ્થિતિ સર્જાઈ હતી. જોકે, ઘટનાની જાણ થતા સ્થાનિક પોલીસ પણ ઘટના સ્થળે દોડી આવી હતી અને મૃતકના મૃતદેહને પોસ્ટમોર્ટમ ખાતે હોસ્પિટલ ખાતે ખસેડીને કાર્યવાહી હાથ ધરી હતી. પોલીસે જામ થયેલા ટ્રાફિકને પણ હળવો કર્યો હતો અને અકસ્માત અંગેની તપાસ શરૂ કરી હતી.