અમદાવાદ : સેટેલાઇટમાં ઘરઘાટીએ કરેલ એક કરોડના મત્તાની ચોરી કેસમાં અમદાવાદ ક્રાઇમ બ્રાંચે ઘરઘાટી રાજા ઉર્ફે મોન્ટુ ચૌધરીનીની ધરપકડ કરીને ગુનાનો ભેદ ઉકેલી કાઢ્યો છે. ક્રાઇમબ્રાન્ચની પૂછપરછમાં જાણવા મળ્યું કે આરોપી ઘરઘાટીને દેવું થઇ જતા ચોરીનો પ્લાન બનાવ્યો હતો. આરોપીની પુત્રી મેડિકલનો અભ્યાસ કરતી હોવાથી પુત્રીને એજ્યુકેશન લોન અને પર્સનલ લોનમાં દેવું થઈ જતાં ચોરી કરી હોવાનું ખુલ્યું છે. હાલ પોલીસે આરોપીને ઝડપી વધુ કાર્યવાહી હાથ ધરી છે.
પ્રાપ્ત રિપોર્ટ મુજબ સેટેલાઈટમાં આવેલ સુમધુર સોસાયટીમાં વેપારીના ઘરે ઘરઘાટી તરીકે નોકરી કરીને માલિકનો વિશ્વાસ કેળવી ચોરી કરી ફરાર થઈ ગયો હતો. જોકે ચોરીના સીસીટીવીનાં આધારે ક્રાઇમ બ્રાન્ચે વેસ્ટ બંગાલથી આરોપી રાજા ચૌધરીની ધરપકડ કરીને ચોરીના 6.70 લાખના દાગીના કબજે કર્યા છે.આ ઘરઘાટી ડિજિટલ તિજોરીમાંથી ચોરી ફરાર થઈ ગયો હતો. જે તિજોરીમાં રોકડ, સોના ચાંદીના દાગીના, હીરાનાં ડાયમંડ મળી આશરે એક કરોડનો મુદ્દામાલ હતો.જેમાં આરોપી રાજા ચૌધરીની પૂછપરછમાં સામે આવ્યું કે તેની પુત્રી મેડિકલનો અભ્યાસ કરે છે જે એજ્યુકેશન લોન અને પર્સનલ લોન લીધી હોવાથી દેવું થઈ ગયું હતું. જે દેવું પૂરું કરવા માટે ચોરી કરી હોવાનું કબલ્યું છે.
પકડાયેલ આરોપી રાજા ચૌધરી પોતાની પુત્રીને ડોકટર બનાવવા માટે ચોર બન્યો હતો. જેમાં આરોપી રાજા ચૌધરી વેસ્ટ બંગાલથી દોઢ મહિના પહેલા ચોરી કરવા ઘરઘાટી બન્યો હતો. જેમાં પોતાની ઓળખના પુરાવા અને નામ પણ ખોટું આપ્યું હતું. ઘરઘાટી નોકરી માટે પોલીસ વેરિફિકેશનમાં ખોટું આધારકાર્ડ આપ્યું હતું. જેમાં રમેશ ચક્રબોર્તી નામનું આધાર કાર્ડ આપ્યું હતું. જેને લઇ તપાસ કરી રહ્યા છે.