અમદાવાદ : શહેરના નારણપુરા વિસ્તારમાં PCBએ મોટી કાર્યવાહી કરીને જુગારધામનો પર્દાફાશ કર્યો છે. AEC ચાર રસ્તા પાસે આવેલા AMC ના ખુલ્લા પાર્કિંગ પ્લોટમાં મૂકવામાં આવેલા કન્ટેનરની અંદર ધમધમતા જુગારના અડ્ડા પર પોલીસે ત્રાટકીને 9 ઈસમોને રંગેહાથ ઝડપી પાડ્યા છે.આરોપીઓ બહારથી આવીને જુગાર રમતા હોવાનું સામે આવ્યું છે.
પ્રાપ્ત રિપોર્ટ મુજબ, પોલીસ કમિશનરની PCB સ્ક્વોડની ટીમને બાતમી મળી હતી કે નારણપુરાના AEC ચાર રસ્તા પાસેના AMC પાર્કિંગમાં એક કન્ટેનરને જુગાર રમવા માટેનું સેફ હાઉસ બનાવવામાં આવ્યું છે. આ બાતમીના આધારે PCBની ટીમે દરોડો પાડતા અંદર પત્તા ટીપી રહેલા 9 શખ્સોમાં દોડધામ મચી ગઈ હતી. પકડાયેલા તમામ ઈસમો વિરુદ્ધ ગુનો નોંધી કાયદેસરની કાર્યવાહી હાથ ધરવામાં આવી છે.
આ દરોડા દરમિયાન PCBએ લાખોની મત્તા જપ્ત કરી છે. પોલીસને જુગારના ટેબલ પરથી 3,03,000 રોકડા મળી આવ્યા હતા. આ ઉપરાંત, આરોપીઓ પાસેથી 10 નંગ મોંઘા મોબાઈલ ફોન પણ જપ્ત કરવામાં આવ્યા છે. આમ, રોકડ અને મોબાઈલ મળીને કુલ 5,23,000/- નો મુદ્દામાલ પોલીસે કબજે કર્યો છે.
નારણપુરા જેવા પોશ વિસ્તારમાં અને તે પણ સરકારી પ્લોટમાં કન્ટેનરની અંદર જુગાર રમાતો હોવાની ઘટનાએ અનેક સવાલો ઉભા કર્યા છે. શું આ જુગારધામ લાંબા સમયથી ચાલતું હતું? અને કોના પીઠબળથી આ પ્રવૃત્તિ થઈ રહી હતી? તે દિશામાં હવે પોલીસે તપાસ તેજ કરી છે. PCBની આ સફળ કામગીરીથી જુગારીઓમાં ફફડાટ વ્યાપી ગયો છે.