અમદાવાદ : અમદાવાદ મ્યુનિસિપલ કોર્પોરેશનની ચૂંટણી માટે કોંગ્રેસ પક્ષે પોતાનો ચૂંટણી ઢંઢેરો સત્તાવાર રીતે જાહેર કર્યો છે. ‘કમિટમેન્ટ’ સાથે જાહેર કરાયેલા આ મેનિફેસ્ટોમાં શિક્ષણ, આરોગ્ય, અને ટેક્સના માળખામાં મોટા ફેરફારો કરવાનું વચન અપાયું છે. અમદાવાદ મ્યુનિસિપલ કોર્પોરેશનમાં કોંગ્રેસનું શાસનમાં આવ્યા બાદ 15થી વધુ વાયદા (કમિટમેન્ટ) પૂરા કરવાની જાહેરાત કરવામાં આવી છે.
આ પ્રસંગે કોંગ્રેસના નેતા ભરતસિંહ સોલંકી અને શહેર પ્રમુખ સોનલબેન પટેલે જણાવ્યું હતું કે આ મેનીફેસ્ટો માત્ર વચનોનો દસ્તાવેજ નથી, પરંતુ લોકોના પ્રશ્નોને સમજ્યા પછી તૈયાર કરાયેલ એક એક્શન પ્લાન છે. તેમણે જણાવ્યું કે અલગ-અલગ ક્ષેત્ર માટે નિષ્ણાતો અને કાર્યકરોની કમિટીઓ બનાવીને વિસ્તૃત ચર્ચા બાદ આ દસ્તાવેજ રૂપી કમિટમેન્ટ પ્લાન તૈયાર કરવામાં આવ્યો છે.
અમદાવાદ મ્યુનિસિપલ કોર્પોરેશનની ચૂંટણી માટે કોંગ્રેસનું કમિટમેન્ટ શું છે?
- પાકા અમદાવાદીઓ માટે પાકા રસ્તા.
- દરેક અમદાવાદનો સપનું પૂરું થશે, સૌની પાસે ઘરનું ઘર હશે.
- ગટર, પીવાનું પાણી અને વરસાદી પાણીનો નિકાલ આવશે.
- દરેક બાળકોને શિક્ષણનો અધિકાર આપવા ધોરણ 12 સુધીની દરેક બોર્ડમાં કોર્પોરેશન સંચાલિત સરદાર પટેલ પ્રાથમિક શાળા શરૂ કરીશું.
- મસ્તીના ધોરણે બોર્ડ દીઠ જરૂર પડે તો એક કરતાં વધારે તિરંગા અર્બન હેલ્થ સેન્ટરનું નિર્માણ કરી સેવા, નિદાન અને સારવારના ધ્યેયને પૂર્ણ કરીશું.
- જેટલી સફાઈ એટલી કમાઈ, યોજના હેઠળ શહેરીજનો અને રહેણાક સોસાયટી કાર્બન ક્રેડિટની કમાણી કરી શકશે. જેનો ઉપયોગ તેઓ કરવેરા થતા અન્ય કોર્પોરેશનની સુવિધાઓની ફીની ભરપાઈ માટે કરી શકશે.
- પ્રોપર્ટી ટેક્સ ઉપરનું 18 ટકાથી ઘટાડીને માત્ર 5 ટકા કરીશું.
- અમદાવાદ શહેરને દેશના ટોપ 5માં સૌથી સ્વચ્છ AQIવાળા શહેરોમાં એક વર્ષમાં પહોંચાડીશું.
- ટ્રાફિકની સમસ્યાનો નિરાકરણ લાવવા લોજીકલ રીતે નવા ફ્લાય ઓવર બનાવીશું સાથે જ જુના રસ્તાઓને જન સહમતિથી પહોળા કરીશું.
- મહિલાઓને વિદ્યાર્થીઓને AMTS બસમાં ફરી મુસાફરી પાસ આપીશું અને AMTSની તમામ બસ AC બનાવીશું
- તમામ લારી, ગલ્લા, પાથરણા અને ફેરિયાઓને સર્વે હાથ ધરી સ્ટ્રીટ વેન્ડર્સ એક્ટ 2014 અંતર્ગત સ્માર્ટ કાર્ડ બનાવી સ્ટ્રીટ વેન્ડર્સ કાયદાનો સંપૂર્ણ અમલ કરીશું.
- શહેરીજનોના રોજિંદા પ્રશ્નોના સમાધાન માટે દર અઠવાડિયે વોર્ડ સુનવણી રાખી સમસ્યાઓની સમાધાન લાવીશું.
- અમદાવાદને દેશનું પહેલું ફાયરવોલવાળું ડિજિટલ શહેર બનાવી હેકર્સ, સ્કેમર્સ અને સ્પામર્સથી છૂટકારો અપાવીશું, તેમજ કોર્પોરેશનની લાઇબ્રેરીમાં વિદ્યાર્થીઓ માટે હાઈસ્પીડ ઇન્ટરનેટ સાથેના કોમ્પ્યુટર મુકીશું