મદાવાદ : અમદાવાદ મ્યુનિસિપલ કોર્પોરેશનના પશ્ચિમ ઝોન દ્વારા ગુજરાત સરકારના સેવા સેતુ કાર્યક્રમ અંતર્ગત આજે સવારે 16 મી એ નવા વાડજ ખાતે સેવા સેતુ કાર્યક્રમનું આયોજન કરવામાં આવ્યું હતું. સ્વ. જોઈતારામ પટેલ કોમ્યુનિટી હોલ ખાતે યોજાયેલા આ કાર્યક્રમમાં અંદાજે 1,956થી વધુ નાગરિકોએ મુલાકાત લીધી હતી. કાર્યક્રમ દરમિયાન વ્યક્તિગતલક્ષી 56 સેવાઓ અંતર્ગત કુલ 1,485 અરજીઓ મળી હતી, જેનો સ્થળ પર જ હકારાત્મક નિકાલ કરવામાં આવ્યો હતો.
રિપોર્ટ મુજબ, ગુજરાત સરકારના સામાન્ય વહીવટ વિભાગ દ્વારા વહીવટમાં પારદર્શિતા વધારવા અને નાગરિકોને વિવિધ સરકારી સેવાઓનો લાભ એક જ સ્થળે મળી રહે તે હેતુથી સેવા સેતુ કાર્યક્રમ અમલમાં મૂકવામાં આવ્યો છે. આ અંતર્ગત અમદાવાદ મ્યુનિસિપલ કોર્પોરેશનના પશ્ચિમ ઝોનમાં કાર્યક્રમ યોજાયો હતો.
કાર્યક્રમમાં નારણપુરાના ધારાસભ્ય જીતેન્દ્રભાઈ આર. પટેલ, સાબરમતીના ધારાસભ્ય ડૉ. હર્ષદભાઈ પટેલ, પૂર્વ મંત્રી બ્રિજેશ મેરજા, પ્રદેશ ઇન્ચાર્જ તથા પૂર્વ ધારાસભ્ય રાકેશભાઈ શાહ સહિતના આગેવાનો અને પદાધિકારીઓ ઉપસ્થિત રહ્યા હતા. આ ઉપરાંત વિવિધ મ્યુનિસિપલ કાઉન્સિલરો, સમિતિઓના ચેરમેન તથા ડેપ્યુટી ચેરમેન, પશ્ચિમ ઝોનના ડેપ્યુટી મ્યુનિસિપલ કમિશનર અને ઉચ્ચ અધિકારીઓ પણ હાજર રહ્યા હતા.
કાર્યક્રમ દરમિયાન ધારાસભ્યો અને અન્ય પદાધિકારીઓએ નાગરિકો સાથે સંવાદ સાધ્યો હતો. વિવિધ સરકારી યોજનાઓ અંગેની માહિતી નાગરિકોને ક્યાંથી મળી અને આ યોજનાઓ તેમના જીવનમાં કેટલી ઉપયોગી બની છે તે અંગે જાણકારી મેળવી હતી. સાથે જ યોજનાઓનો લાભ મેળવનારા લાભાર્થીઓને પોતાના અનુભવો અન્ય નાગરિકો સુધી પહોંચાડવા અપીલ કરવામાં આવી હતી, જેથી વધુમાં વધુ લોકો સરકારી યોજનાઓનો લાભ લઈ શકે.
સેવા સેતુ કાર્યક્રમમાં પીએમજે હેઠળની સેવાઓ, હેલ્થ વેલનેસ કાર્ડ, આધાર કાર્ડ સંબંધિત સેવાઓ, પ્રોપર્ટી ટેક્સ અને પીએમ સ્વનિધિ યોજના સહિતની સેવાઓ માટે કામગીરી કરવામાં આવી હતી. પીએમજે સંબંધિત 110, હેલ્થ વેલનેસ કાર્ડ માટે 748, આધાર કાર્ડ સંબંધિત સેવાઓ માટે 50, પ્રોપર્ટી ટેક્સ માટે 92 અને પીએમ સ્વનિધિ યોજના માટે 327 અરજીઓ સહિત વિવિધ સેવાઓ માટે નાગરિકોએ લાભ લીધો હતો.
નાગરિકોને સરકારી સેવાઓ માટે અલગ-અલગ કચેરીઓના ધક્કા ખાવા ન પડે અને તેમની અરજીઓનો ઝડપી નિકાલ થાય તે દિશામાં યોજાયેલા આ કાર્યક્રમમાં સંબંધિત વિભાગોના અધિકારીઓ અને કર્મચારીઓ હાજર રહ્યા હતા. સ્થળ પર જ અરજીઓનો હકારાત્મક નિકાલ થતાં નાગરિકોને રાહત મળી હતી.