અમદાવાદ : શહેરમાં ટ્રાફિકની સમસ્યા માથાનો દુખાવો બની ગઈ છે ત્યારે શહેરમાં સૌથી વધુ ટ્રાફિક રહેતો હોય તેવાં 27 જંક્શન પર ટ્રાફિક પોલીસ અને મ્યુનિ.એ મળી કેપ્સ્યુલ સિસ્ટમ લાગુ કરી છે.તંત્ર દ્વારા નારોલ સર્કલ બાદ હવે બાપુનગર ચાર રસ્તાને પણ સિગ્નલ ફ્રી બનાવી દેવામાં આવ્યા છે. વાહનચાલકોએ હવે ચાર રસ્તા પર ઊભા રહેવાને બદલે 100 થી 200 મીટર આગળ જઈને યુ ટર્ન લેવાનો રહેશે.
રિપોર્ટ મુજબ, અમદાવાદ ટ્રાફિક ડીસીપી (ઈસ્ટ) નરેશ કણાઝરિયાના જણાવ્યા પ્રમાણે, શહેરમાં અત્યાર સુધીમાં કુલ 28 ટ્રાફિકથી વ્યસ્ત જંકશનો પર કેપસ્યુલ સિસ્ટમ અમલી બનાવી દેવામાં આવી છે. આગામી ત્રણ મહિનાની અંદર શહેરના અન્ય વધુ 20 મુખ્ય જંકશનો પર આ કેપ્સ્યુલ ડિઝાઈન સિસ્ટમ લાગૂ કરવાની તૈયારીઓ પૂરજોશમાં ચાલી રહી છે. શનિવારે વધુ એક બાપુનગર ચાર રસ્તા પર આ સિસ્ટમ લાગુ કરાઈ હતી. હવે આ ચાર રસ્તા પર ઊભા રહેવાને બદલે 100 થી 200 મીટર આગળ યુટર્ન લેવાનો રહેશે.
શહેરમાં કેપ્સ્યુલ સિસ્ટમના કારણે વાહનોની અવરજવર સતત ચાલુ રહે છે અને સિગ્નલ પરનો વેઈટિંગ ટાઈમ ઘટે છે, પરંતુ તેનાથી રોડ ઓળંગતા રાહદારીઓ માટે નવી મુશ્કેલી ઊભી થઈ છે. દાખલા તરીકે, પેલેડિયમ મોલ જંક્શન પાસે વાહનોની સતત સ્પીડને કારણે પેડેસ્ટ્રિયન્સ માટે રસ્તો વાસવો કે રોડ ક્રોસ કરવો અત્યંત જોખમી સાબિત થઈ રહ્યો છે, જેથી આ મોડેલમાં રાહદારીઓ માટે ક્રોસિંગ સેફ્ટી વિચારવી પણ જરૂરી બની છે.
આ જંક્શન પર કેપ્સ્યુલ સિસ્ટમનું આયોજન
1. વૈષ્ણોદેવી
2. ગોતા
3. સોલા ભાગવત
4. પકવાન
5. પ્રહલાદનગર
6. અંધજન મંડળ
7. દિલ્હી દરવાજા
8. ચોખા બજાર
9. ઇન્કમટેક્સ બ્રિજની નીચે
10. રૂબીથી નરોડા
11. નોબલનગર
12. નરોડા બેઠક
13. ઠક્કરનગર
14. રબારી કોલોની
15. સુતરનું કારખાનું, નરોડા જીઆઈડીસી
16. ગુજરાત બોટલિંગ
17. અજિત મિલ ચાર રસ્તા
18.નાગરવેલ હનુમાન
19. જશોદાનગર
20. મહારાણા પ્રતાપ જંક્શન, ખોખરા