અમદાવાદ: ફિલિપાઈન્સમાં MBBS નો અભ્યાસ કરતો વિદ્યાર્થી મુલચંદ ડાકા નામનો યુવક 13 ફેબુઆરીએ ભારત આવ્યો હતો. મૂળ રાજસ્થાનનો આ યુવક પોતાના ફિલિપાઈન્સના મિત્ર ફિરોજના ભાઈ નવાબનું પાર્સલ લેવા રાજસ્થાનથી અમદાવાદ આવ્યો હતો. ત્યારે વાડજ ખાતે આ લૂંટારાઓએ યુવકને પાર્સલ લેવા આવ્યો છે, તેવું કહીને મારવાની ધમકી આપીને તેની પાસેથી પાસપોર્ટ, મોબાઈલ અને ATM કાર્ડની લૂંટ કરી હતી.વાડજ પોલીસે ગણતરીના કલાકોમાં લૂંટનો ભેદ ઉકેલી નાખ્યો અને આ કેસમાં સંડોવાયેલા ચારેય આરોપીની ધરપકડ કરી છે.
પ્રાપ્ત રિપોર્ટ મુજબ રાજસ્થાનનો મૂલચંદ ફિલિપાઇન્સમાં MBBS માં અભ્યાસ કરે છે. મૂલચંદ ભારત આવે ત્યારે તેની સાથે અભ્યાસ કરતા ઇરફાનનું પાર્સલ તેમ જ પૈસા તેના ભાઈ નવાબ પાસેથી લઈને ફિલિપાઇન્સ પહોંચાડી દેતો હતો. હાલમાં મૂલચંદ ભારત આવ્યો હોવાથી નવાબે તેને ફોન કરીને વાડજની ફોર્ચ્યુન લેન્ડ માર્ક હોટેલ પાસેથી પાર્સલ લઈ લેવા જણાવ્યું હતું, જેથી મૂલચંદ શનિવારે સવારે જયપુરથી ફ્લાઇટમાં અમદાવાદ આવ્યો હતો અને નવાબનું પાર્સલ લેવા ગયો હતો. ત્યારે ત્યાં 4 લોકો આવ્યા હતા અને પાર્સલ લેવાના બહાને મૂલચંદને જૂના વાડજ હાલારનગરની એક ઓફિસમાં લઈ ગયા હતા અને તેની પર પંચ વડે હુમલો કરી પાસપોર્ટ, એટીએમ કાર્ડ, ફોન, પૈસા લૂંટી લીધા હતા.આ અંગે મૂલચંદે વાડજ પોલીસ સ્ટેશનમાં ફરિયાદ નોંધાવી હતી, જેના આધારે પોલીસે ભાવિન ચક્રવર્તી, ચિરાગ ચૌહાણ, વિકાસ મકવાણા અને વિશાલ વાઘેલાની ધરપકડ કરી હોવાનું પીઆઈ સી. જી. જોશીએ જણાવ્યું હતું.
સમગ્ર ઘટનાની વાત કરીએ તો વાડજ પોલીસે ફરિયાદીની હકિકત જાણતા અલગ-અલગ ટીમો બનાવીને તપાસ કરતા પોલીસે ગણતરીના કલાકોમાં લૂંટનો ભેદ ઉકેલી નાખ્યો અને આ કેસમાં સંડોવાયેલા ચારેય આરોપીની ધરપકડ કરી છે. પોલીસ તપાસ દરમિયાન સામે આવ્યું છે કે, પકડાયેલા ચારેય આરોપીઓ ગુનાહિત ઈતિહાસ ધરાવતા છે. જે પૈકી મુખ્ય આરોપી ભાવીન ચક્રવતી વિરૂધ્ધ સાયબર ક્રાઈમ અને ટ્રાફિક પોલીસ સ્ટેશનમા ગુના નોંધાયા છે. જયારે વિશાલ ઉર્ફે વિસુ વાઘેલા વિરૂધ્ધ વાડજ અને સોલામાં મારામારી અને પ્રોહિબીશનના 4 ગુના નોંધાયા. એટલું જ નહીં, પણ વિશાલ એક વખત પાસા હેઠળ સજા પણ ભોગવી ચૂક્યો છે. આ ઉપરાંત ચિરાગ ચૌહાણ સામે બે ગુના અને વિકાસ મકવાણા સાને એક ગુનો નોંધાયો છે.
ગુનાહિત ઈતિહાસ ધરાવતા આ આરોપીઓની ધરપકડ કરીને વાડજ પોલીસે લૂંટનો મુદ્દામાલ જપ્ત કર્યો છે. મહત્વનું છે કે, આ લૂંટ કેસમાં આરોપીઓ નવાબનું પાર્સલ લેવા આવ્યા હોવાનું કહીને લૂંટને અંજામ આપ્યો હતો. જેથી લૂંટમાં નવાબની સંડોવણી છે કે નહીં, તે મુદ્દે પોલીસે તપાસ શરૂ કરી છે.