અમદાવાદ : શહેરમાં ફરી એક વાર ચેઇન સ્નેચીંગની ઘટનાઓનું પ્રમાણ વધ્યું છે. તાજેતરમાં શહેરના ચાંદખેડા અને નરોડા પોલીસ મથકે ચેઇન સ્નેચીંગની વધુ બે ઘટના નોંધવામાં આવી છે. ચાંદખેડામાં મોર્નિગ વોક માટે નીકળેલી વૃદ્ધાના ગળામાંથી ચેઇન ખેંચીને ગઠીયા ફરાર થઇ ગયા હતા. જ્યારે નરોડા પાસે વોક માટે નીકળેલા વૃદ્ધના ગળામાંથી રૂદ્રાક્ષની માળા ખેંચીને સ્નેચર્સ નાસી ગયા હતા.
પ્રાપ્ત રિપોર્ટ મુજબ, શહેરના ચાંદખેડા અને નરોડા વિસ્તારમાં ચેઇન સ્નેચીંગની બે ઘટનાઓ પોલીસ મથકે નોંધવામાં આવી છે. જેમાં ચાંદખેડા વિસ્તારમાં મોર્નિગ વોક માટે નિકળેલી વૃદ્ધાના ગળામાંથી બે શખ્સોએ 40 હજારની ચેઇન ખેંચીને લઇ ગયા હોવાની ઘટના પ્રકાશમાં આવી છે. ચાંદખેડા વિસ્તારમાં આવેલા મેપલ પરમેશ્વર ફ્લેટ્સમાં રહેતા રજત સિંઘે ચાંદખેડા પોલીસ સ્ટેશનમાં બે અજાણ્યા શખ્સો વિરૂદ્ધ ચેઇન સ્નેચિંગની ફરિયાદ કરી છે.
અન્ય બનાવમાં નરોડા વિસ્તારના વ્યાસવાડી પાસે આવેલા કૃષ્ણકુંજ સોસાયટીમાં રહેતા મૌલિક વ્યાસે કૃષ્ણનગર પોલીસ સ્ટેશનમાં ચેઇન સ્નેચિંગની ફરિયાદ કરી છે.થોડા દિવસ પહેલા તેમના પિતા સુર્યકાંતભાઇ મોર્નિંગ વોક માટે નીકળ્યા હતા ત્યારે ટુ વ્હિલર પર બે શખ્સો મોઢા પર રૂમાલ બાંધીને 2.10 લાખ રૂપિયાની રૂદ્રાક્ષની માળા ખેંચીને લઇ ગયા હતા.આ મામલે કૃષ્ણનગર પોલીસ સ્ટેશનમાં ફરિયાદ કરી છે. પોલીસે ફરિયાદ નોંધીને તપાસ શરૂ કરી છે.